Në Fort Totten, në Kuins të Nju-Jorkut, pranë ujit dhe mes gjelbërimit, ndodhet një kamion zjarrfikës që tërheq vëmendjen jo për pamjen e tij, por për atë që mbart. Në trupin e kuq të automjetit janë shkruar emrat e 343 zjarrfikësve të FDNY-së që humbën jetën më 11 shtator 2001. Isha aty dhe vendosa të pozoja pranë tij. Ishte një fotografi, por arsyeja nuk ishte thjesht fotografia. Doja të fiksoja një vend ku emrat e 343 njerëzve janë bërë pjesë e hapësirës.
Kamioni memorial
Njëzet e pesë vjet pas sulmeve ndaj Kullave Binjake, në Fort Totten qëndron kamioni me mbishkrimin “Ladder 343 – Never Forget – Box 55-8087”. Në trupin e tij janë vendosur, njëri pas tjetrit, emrat e 343 anëtarëve të Departamentit të Zjarrfikësve të Nju-Jorkut që humbën jetën atë ditë. Lista nuk ka nevojë për shumë shpjegime. Pas çdo emri fshihet një jetë, një familje dhe një vend pune ku ai njeri nuk u kthye më. Ky nuk është kamioni origjinal i Ladder 3, i cili u dëmtua rëndë gjatë shembjes së kullave dhe sot ruhet në Muzeun Përkujtimor të 11 Shtatorit në vendin e Qendrës Botërore të Tregtisë. Automjeti në Fort Totten është një kamion memorial, i ndërtuar për të ruajtur kujtimin e 343 zjarrfikësve.
Çfarë do të thotë 55-8087?
Edhe mbishkrimi në kamion ka historinë e vet. Box 55-8087 ishte kodi i alarmit për incidentin në Qendrën Botërore të Tregtisë. Pas përplasjes së avionit të parë, sistemi i emergjencës mobilizoi njësitë e zjarrfikësve drejt Manhatanit. Brenda pak minutash, një numër i madh njësish të FDNY-së u nisën drejt kullave. Në fund të asaj dite, 343 prej tyre nuk u kthyen.
Numri 343 përfshin zjarrfikës, oficerë dhe personel tjetër të shërbimit zjarrfikës që ndodheshin në operacionin e shpëtimit. Humbja ishte veçanërisht e rëndë për FDNY-në, sepse shumë prej tyre u futën në ndërtesat që digjeshin ndërsa njerëzit e tjerë përpiqeshin të dilnin prej tyre.
Fort Totten
Fort Totten është një ish-fortifikim ushtarak në veri të Kuinsit, në një pikë nga ku shihen ujërat e Long Island Sound. Sot zona ka një funksion krejt tjetër: pjesë të saj përdoren nga strukturat ushtarake, ndërsa hapësirat përreth janë të hapura për publikun. Në këtë mjedis, kamioni memorial duket pothuajse si një objekt i ardhur nga një tjetër kohë. Përreth ka pemë, rrugica dhe qetësinë karakteristike të një parku. Në kamion, ndërkaq, qëndrojnë 343 emra. Edhe “Never Forget”, fraza e vendosur mbi të, këtu nuk ka nevojë për shpjegim. Mjafton të lexosh listën.
11 shtatori nuk përfundoi me shembjen e kullave. Pas operacioneve në Ground Zero, shumë prej njerëzve që punuan atje u përballën me pasoja shëndetësore dhe një pjesë e tyre vdiqën në vitet që pasuan.
Por në Fort Totten kujtesa është më konkrete: një kamion, një numër alarmi dhe 343 emra të shkruar mbi llamarinë. Dhe kjo mjafton!
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
