Fuqia dhe suksesi i një gruaje ka vlerë, kur e arrin vetë atë dhe jo kur e merr si dhuratë nga burrat e pushtetshëm. Kur e fiton vetë nuk e shfrytëzon asnjëherë për të patur kontroll mbi të tjerët dhe nënshtrim ndaj atij që i detyrohet. Përkundrazi, një grua vërtet e pushtetshme e ka zbuluar së pari, këtë forcë brenda vetes së bashku me bukurinë e feminitetit të vet.
Nga Rita Petro, Poete
Dhe s’ka hiç nevojë të shndërrohet në një “burrë arrogant” për të sfiduar pengesat që has çdo ditë nga stereotipet gjinore. Në shoqërinë shqiptare gruaja e ka dyfish vështirë, pasi kur arrin majën e suksesit dhe ka pushtet intelektual, profesional e material, sulmohet edhe nga burrat edhe nga gratë. E kundërta ndodh me një burrë të suksesshëm që admirohet edhe nga gratë edhe nga burrat.
Nga ana tjetër, gratë luftojnë ashpër për vendin e parë, kur atje është një grua, ndërsa kur është aty një burrë, nuk e kanë problem që qetësisht të kalojnë në vendin e dytë.
Gjithsesi, pushteti i bukur femëror ka kohë që po sfidon e po hap dritare, teksa heq tulla në muret e shoqërisë shqiptare.
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
