A njihni njerëz autentikë? Jeni një prej tyre? A e dini se si janë ata? Ndoshta keni pranë jush njerëz të tillë ose i keni njohur në të kaluarën dhe as nuk i keni vënë re. Këta njerëz janë një frymë ajri të pastër, të aftë për të mbushur me jetë çdo vend ku gjenden. Ata janë të lehtë për t’u identifikuar, sepse kur vijnë në jetën tuaj, e mbushin atë me energji, gëzim dhe frymëzim. Kanë një qëndrim të këndshëm dhe kushdo ndihet mirë dhe i sigurt pranë tyre.
Njerëzit autentikë na bëjnë të ndihemi aq mirë sa na lejojnë të jemi vërtet vetvetja. Kur jeni me ta, mund të lini mënjanë gënjeshtrën ose paragjykimet. Ata e dinë që çdo person është i veçantë dhe do t’ju bëjnë të ndiheni unikë dhe të pazëvendësueshëm. Ja disa karakteristika të njerëzve autentikë:
- Nuk kanë frikë të shprehin mendimin e tyre
Njerëzit autentikë e dinë se rrallë është mirë që një opinion të mbetet i pashprehur. Nëse kanë diçka për të thënë, e thonë dhe i vënë pikën. Por kini kujdes: ata gjithmonë kujdesen që të mos shkaktojnë dëm ose lëndojnë të tjerët kur e bëjnë këtë. Ata përpiqen të dëgjohen dhe t’i bëjnë idetë e tyre të vlefshme, por nuk duan të lëndojnë askënd. Shumë shpesh preferojmë të fshehim mendimin tonë sepse kemi frikë nga kritikat. Njerëzit autentikë e dinë se është e lehtë të gjykohesh, por që kritikat nuk pasqyrojnë gjithmonë personin që jemi. Ata e kuptojnë se mendimet e njerëzve të tjerë për ta janë vetëm sipërfaqësore. Një nga virtytet e tyre më të mira është se ata e dinë se mendimet nuk duhen marrë personalisht.
- Veprojnë pas arsyeve të brendshme dhe jo të jashtme
Kur ishte hera e fundit që keni bërë diçka thjesht sepse e keni ndjerë atë? Njerëzit autentikë e bazojnë jetën e tyre në shkallën personale të vlerave që kanë dhe bëjnë vetëm atë që duan. Ata e dinë se nuk mund të varen nga të tjerët për të qenë të lumtur dhe për të arritur qëllimet e tyre. Janë të pavarur dhe të gatshëm të ndërmarrin rreziqe për të arritur atje ku duan.
- Miku i tyre më i mirë është “vetja e tyre e brendshme”
Njerëzit autentikë janë shumë të ndryshëm nga njëri-tjetri. Disa kanë shumë miq, sepse janë të mirë në marrëdhëniet me të tjerët. Të tjerët janë më introvertë dhe preferojnë të kenë miq të paktë, por shumë të ngushtë. Ata kurrë nuk do të bëjnë asgjë që bie ndesh me sistemin e tyre të vlerave dhe të folurit e tyre me veten është pozitiv. Nuk e lejojnë veten të sabotohen nga dialogu i brendshëm disfatist.
- I shmangen gjykimit
Njerëzit autentikë e dinë se nuk është e lehtë të ndjekësh rrugën e tyre dhe për këtë arsye ata nuk humbin kohë duke gjykuar. Me shumë mundësi, nëse duhet t’ju thonë diçka ose t’ju japin mendimin e tyre të sinqertë, ata do t’jua japin atë. Por më pas do ta harrojnë atë dhe do t’ju lejojnë të merrni vendimet tuaja. Ju mund të mbështeteni në mënyrën më të sinqertë tek ata dhe mund të prisni një mendim të sinqertë prej tyre.
- I njohin dhe vlerësojnë cilësitë e tyre
Edhe pse reklamat përpiqen të na bindin se disa standarde të bukurisë janë më të përshtatshmet, njerëzit autentikë e dinë se secili prej nesh është i veçantë. Ata nuk shqetësohen për përmbushjen e standardeve të paracaktuara, por fokusohen në njohjen e vetvetes dhe vlerësimin e tyre për atë që janë. Gjithashtu i dinë të metat dhe dobësitë e tyre dhe kanë mësuar të përfitojnë prej tyre ose të minimizojnë efektet e tyre negative.
- Nuk japin këshilla që nuk do t’i ndiqnin
Njerëzit autentikë e dinë se të kritikosh, të gjykosh ose të flasësh shumë është e keqe. Ata gjithashtu e dinë se dhënia e një mendimi ose këshille është më e lehtë sesa ta zbatojnë atë në praktikë. Për këtë arsye, kur i kërkon këshilla, ata mendojnë mirë para se të flasin. Do t’i njihni sepse janë njerëzit që ju japin këshillat më realiste. Ata kanë sukses sepse flasin nga përvoja e tyre dhe kurrë nuk do t’ju sugjerojnë të bëni diçka që nuk do ta bënin vetë.
- Kujdesen për veten fizikisht dhe emocionalisht
Njerëzit autentikë e vlerësojnë veten për atë që janë dhe bëjnë gjithçka që munden për të mbajtur trupin dhe mendjen e tyre në formë . Ata i kushtojnë kohë kujdesit për bukurinë e tyre, bëjnë aktivitet fizik, kujdesen për dietën dhe marrëdhëniet e tyre ndërpersonale. Ata e dinë se jeta është çështje prioritetesh dhe se çdo gjëje duhet t’i japim peshën e duhur.
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
