Pas 20 vitesh shkencëtarët arrijnë në një zbulim krejt suprizues, duke qëlluar në medikamente që kurojnë njëherësh sëmundje si diabeti, veshkat dhe zemrën. Mjekimet e reja mbi këto zhvillime ishin një zbulim aksidental medikamentesh, ndërsa për shkencëtarët një arritje e madhe e cila do të lehtësojë pacientët, sidomos ata që vuajnë nga veshkat, duke iu mundësuar stopimin e sëmundjes.
Të ftuar në studion e Wake Up mëngjesin e së mërkurës, Prof. Christoph Wanner, president i Shoqatës Evropiane të Nefrologjisë dhe Shef i Shërbimeve të Nefrologjisë dhe Hipertensionit në spitalin universitar në Wolfsburg në Gjermani dhe Prof. Myftar Barbullushi, shef i Shërbimit të Nefrologjisë në QSU Nënë Tereza në Tiranë, rrëfyen më shumë mbi këtë risi, duke e sjellë si informacion në kuadër të një konference që zhvillohet në vendin tonë mbi shëndetin e veshkave.
Prof. Christoph Wanner: Pas 20 vitesh të mjekimeve të zakonshme që kemi patur, kemi arritur në daljen e medikamenteve të reja që mund të fuqizojnë funksionin e veshkave, në pacientët të cilët janë në risk.
Është shumë e gëzueshme për ne sepse mund të ndihmojmë pacientët që ta shtyjnë sa më shumë dializën, dhe të mund t’i mbajnë veshkat e tyre në një stad më të mirë. Ky medikament ka ardhur tashmë në treg, ne mund ta përdorim atë dhe i jep pacientëve një shans për të stopuar sëmundjen e veshkave.
Prof. Myftar Barbullushi: Aktualisht kemi një studim të fundit, ku rreth 10% e popullatës rrezikojnë të humbasin funksionin e veshkës. Pra 1 në 10 njerëz të zakonshëm kanë shansin e keq që të shkojnë në dializë ose në transplant. Dhe kjo është një shifër e konsiderueshme. Kjo është arsyeja që sot ne po i afrohemi 1600-1700 pacientëve që bëjnë dializë. Rreth 350-400 që po bëjnë transplant. Në këtë kuadër dhe në kuadër të shifrave të globalizuara, për të pakësuar numrin e pacientëve që humbin përfundimisht funksionin e veshkës dhe jetojmë me dializë ose transplant, për 20 vitet e fundit, ky është lajmi më i mirë.
Së fundi vijnë dy klasa medikamentesh të cilat vijnë fillimisht në fushën e diabetit, me qëllimin fillimisht për të ulur nivelin e sheqerit, por shohim në mënyrë të rritur dhe surprizuese që këto medikamente pengojnë dëmtimin e zemrës në të sëmurët diabetikë, dhe pengojnë dëmtimin e veshkës pikërisht tek këta të sëmurë. Dhe më pas, kjo klasë medikamentesh tregoi që tek të gjithë të sëmurët pavarësisht nga diabeti ose jo, ul dëmtimin e veshkës, i ngadalëson rrugën të sëmurit me dëmtime fillestare të veshkave për të shkuar në dializë ose të transplant, ose e bllokon fare atë. Nuk shoh asnjë lloj vështirësie. Kosto e këtyre medikamenteve nuk është e lartë.
Burimi Wake Up
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
