Përshëndetje, emri im është G. Jam 18 vjeçe. Nëna ime humbi bashkëshortin dhe babanë tim disa vite më parë. Që nga ajo kohë, ajo ka nisur të luajë bixhoz. Nuk merr pak në muaj (midis pensionit të babait tim dhe punës që paguhet). Tashmë kemi humbur një shtëpi dhe mezi po ia dalim mbanë me të ardhurat mujore. Jam shumë e shqetësuar për të. Kur isha 11 vjeçe ajo më kishte premtuar se do të kurohej, por nuk e bëri. Ajo i merr borxh dhe të afërmve, duke u justifikuar për nevojat që kemi. Nuk di çfarë të bëj, të gjithë jemi përpjekur të flasim me të, por ajo nuk sheh asgjë të keqe. I kërkoj këshilla sepse nuk di si të sillem. Faleminderit.
Nga Denada TOÇE, psikologe këshillimi
Përshëndetje e dashur lexuese. Varësia ndaj lojërave të fatit është si varësia ndaj alkoolit apo drogës. Për shumë njerëz, bixhozi është argëtim i padëmshëm, por mund të bëhet problem. Ky lloj i sjelljes kompulsive shpesh quhet “kumar me probleme”.Një varësi nga kumari është një varësi progresive që mund të ketë shumë pasoja negative psikologjike, fizike dhe sociale. Ai klasifikohet si një çrregullim i kontrollit të impulsit. Sigurisht që ka trajtim, por është afatgjatë dhe kërkon bashkëveprimin e personit që vuan. Ndonjëherë ka shumë rezultat kur edhe familja merr këshillim së bashku me atë që ka varësi ndaj lojërave të fatit. Ka rezultuar të jetë një bashkëpunim i frytshëm. Ashtu si me varësitë e tjera, pasojat e lojërave të fatit mund të çojnë në ndjenja dëshpërimi dhe pafuqie, depresioni dhe ankthi. Në disa raste, kjo mund të çojë në përpjekje për vetëvrasje. Pra, kemi të bëjmë me vështirësi që nuk janë aspak të lehta për personin në varësi, ndaj duhet kuptuar si një patologji. Nëse ky individ nuk trajtohet, ju do të jeni aty për ta fajësuar atë dhe veten tuaj që nuk gjetët zgjidhje. Çdo lloj shantazhi që mund të përdoret, edhe vetë familjarët janë pjesë e një trillimi në mendjen e personit, që asnjë gjë e keqe nuk mund të jetë me keq se ku ndodhet ai apo ajo. Është si një rreth vicioz. Dëshiroja t’ju fusja një herë në botën e vështirësisë përpara së të kuptonit zgjidhjen dhe mundësitë që mund të keni për ta ofruar këtë lloj ndihme. Në përgjithësi, trajtimi ndahet në tre lloje:Terapia: Kjo mund të jetë terapi e sjelljes ose terapia Konjitive Bihejviorale (CBT). Terapia e sjelljes ndihmon një individ të zvogëlojë dëshirën për të luajtur bixhoz, duke i ekspozuar në mënyrë sistematike ndaj sjelljes. CBT ndihmon në ndryshimin e mënyrës në të cilën individi ndjen dhe mendon për lojërat e fatit.
Ilaçet: Stabilizuesit e gjendjes shpirtërore dhe ilaçet kundër depresionit mund të ndihmojnë në zvogëlimin e simptomave dhe sëmundjeve që ndonjëherë shfaqen me varësitë e lojërave të fatit. Disa ilaçe kundër depresionit mund të zvogëlojnë dëshirën për lojëra të fatit. Antagonistët narkotikë – ilaçet e përdorura për të trajtuar varësitë nga droga – mund të ndihmojnë disa lojtarë të rrezikshëm siç mund të jetë edhe nëna juaj. Kjo do të duhet të punohet ngushtë midis terapistit CBT që e ndjek dhe Psikiatrit.Grupet e vetë-ndihmës: Disa e konsiderojnë të dobishme të flasin me të tjerët në një situatë të ngjashme. Por jo gjithmonë janë efikase të funksionojnë si një metodë e vetme. Do të duhet të kombinohet edhe me qasjet si më sipër.
Botuar në Revistën “Psikologjia”, Nr. 172
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
