A ke ndonjë mik apo të njohur që gjithmonë u përgjigjet mesazheve të tua, por rrallë merr iniciativën për të të shkruar vetë, qoftë edhe thjesht një “Si je?”? Nëse po, nuk je i/e vetme – dhe ka disa arsye pse ndodh kjo.
Kur komunikimi bëhet një-drejtimësh
Disa njerëz janë të prirur të jenë reaktivë, por jo proaktivë. Ata nuk do të të shkruajnë vetë, përveçse nëse iu dërgon ti mesazh më parë. Telefoni yt nuk do të bjerë kurrë nga një mesazh i papritur prej tyre, thjesht për të treguar kujdes, mirënjohje apo interes.
Kjo lloj sjelljeje mund të jetë shqetësuese, sidomos në një botë ku një pjesë e madhe e marrëdhënieve tona zhvillohet përmes ekranit të telefonit. Kur dikush me të cilin kemi pasur lidhje të ngushtë pushon së ndari gjëra me ne – qoftë mendime, foto apo ndjenja të përditshme – ne fillojmë të dyshojmë. Çfarë po ndodh? Pse është ftohur kjo marrëdhënie?
Mesazhet si pasqyrë e lidhjes
Në ditët e sotme, cilësia e një marrëdhënieje shpesh shihet edhe përmes mënyrës së komunikimit në mesazhe. Kur dikush ndalon së shkruari si më parë, apo nuk tregon më interes, ka gjithmonë një arsye. Edhe kur përgjigjen, mund të jetë vetëm nga ndjenja detyrimi – jo sepse duan me të vërtetë të qëndrojnë të lidhur me ty.
Ndikimi i teknologjisë dhe pritshmëritë tona
Komunikimi përmes mesazheve është bërë pjesë e pandashme e jetës sonë. Madje, për shumë të rritur nën 50 vjeç, është forma më e përdorur e komunikimit. Shkruajmë për të ndarë ndjenja, lajme të vogla, momente spontane. Dhe, kur këto mesazhe nuk marrin përgjigjen që presim, ndjejmë mungesën dhe pyesim veten: “Mos ndoshta nuk i bëj më përshtypje këtij personi?”
Kur dikush nuk të shkruan sepse po largohet gradualisht
Një arsye tjetër pse dikush nuk merr më iniciativë është sepse nuk ka më interes – por nuk ka guximin ta thotë hapur. Kjo është ajo që quhet një “zhdukje e ngadaltë” ose gjysmë-fantazmëzim. Takimet bëhen gjithnjë e më të rralla, bisedat më të ftohta, përgjigjet më të shkurtra. Në vend që të përballen me realitetin, ata thjesht lejojnë kohën dhe ftohtësinë të bëjnë punën e tyre.
Kur marrëdhënia është e njëanshme – narcisizmi në komunikim
Ka edhe raste ku dikush tregon interes vetëm për të folur për veten. Një “Si je?” nga ana jote mund të jetë bileta e tyre për të folur gjatë për jetën, sukseset, ndjesitë e tyre. Por rrallë – nëse ndonjëherë – do të marrin iniciativën të të pyesin ty për ty. Ky lloj komunikimi tregon mungesë empatie dhe ndonjëherë edhe prirje narcisiste – ku interesi ekziston vetëm kur flitet për ta.
Jo çdo heshtje është negative
Nga ana tjetër, duhet ta pranojmë se jo të gjithë njerëzit janë të apasionuar pas mesazheve. Ka nga ata që thjesht preferojnë të flasin ballë për ballë, të dalin për një kafe, të kalojnë kohë së bashku në realitetin fizik, jo përmes ekranit.
Mund të mos jenë shumë aktivë në WhatsApp, por do të të telefonojnë dhe do të bisedojnë me orë të tëra. Dhe kjo ka vlerë shumë më të madhe sesa një mori mesazhesh të thata.
Në fund të fundit…
Jo çdo mik që nuk të shkruan do të thotë se nuk të vlerëson. Por nëse ndjen mungesë interesi të vazhdueshme, nëse komunikimi është një-drejtimësh dhe i ftohtë, ndoshta është koha të reflektosh mbi atë marrëdhënie. Lidhjet e vërteta qëndrojnë mbi ndjeshmëri, interes të ndërsjellë dhe dëshirë për të ndarë kohën – qofshin këto në botën dixhitale apo në jetën reale.
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
