Rreth 54 % të vdekjeve në vend vitin e shkuar, kanë ardhur si pasojë e sëmundjeve të aparatit të qarkullimit të gjakut. Goditjet në tru, sipas Institutit të Statistikave, renditen të parat për humbjet e jetëve. Mjekët neurologë thonë, se po t’i drejtohemi specialistit, sapo të na shfaqen shenjat, mund të shpëtojmë jetën e ulim mundësinë për të mbetur invalid.
Goditjet në tru, hemorragjitë dhe sëmundjet kronike të zemrës renditen si shkaku kryesor i humbjeve të jetëve vitin e shkuar.
53.7% e vdekjeve sipas Institutit të Statistikave kanë ardhur si pasojë e këtyre sëmundjeve, duke shënuar një rritje prej 2.5% krahasuar me vitin paraardhës.
Më të rrezikuarit tregojnë mjekët neurologë janë personat mbi 40 vjeç për shkak të hipertensionit e diabetit, por përdorimi i drogave po bën që ishemitë të prekin edhe moshat më të reja.
Pas grupit të sëmundjeve të aparatit të qarkullimit të gjakut Instituti i Statistikave rendit tumoret si përgjegjësi i dytë për humbjet e jetëve në vend.
Vdekjet prej tyre përbëjnë 16.4% të rasteve ku kryesojnë tumoret e aparatit të frymëmarrjes me 33.5%.
Burimi / gsh.al
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
