Me rritjen e temperaturave në muajt e nxehtë të verës, rritet edhe rreziku i helmimeve nga ushqimet. Nxehtësia përshpejton prishjen e produkteve ushqimore dhe krijon kushte ideale për shumimin e baktereve të rrezikshme si Salmonela, E. Coli apo Listeria.
Helmimi ushqimor nuk është vetëm një shqetësim i përkohshëm, nëse neglizhohet, mund të shkaktojë pasoja serioze, veçanërisht te fëmijët, të moshuarit dhe personat me imunitet të dobët.
Shenjat që nuk duhen injoruar
Këto janë simptomat më të zakonshme të helmimit ushqimor që kërkojnë vëmendje:
Të përziera dhe të vjella
Diarre (me ose pa gjak)
Dhimbje barku apo ngërçe
Temperaturë e lartë
Dobësi dhe marramendje
Humbje oreksi apo dehidrim
Në raste më të rënda, mund të shfaqen simptoma si konfuzion, lëkurë e ftohtë dhe e lagësht, apo vështirësi në frymëmarrje, këto kërkojnë ndërhyrje të menjëhershme mjekësore.
Si të mbrohemi gjatë verës?
1.Kujdes me ruajtjen e ushqimit
Mbaji ushqimet e prishshme gjithmonë në frigorifer nën 5°C.
Mos i le ushqimet e gatuara në temperaturë ambienti për më shumë se 2 orë.
Gjatë piknikëve apo udhëtimeve, përdor çantë termike ose akull për ftohje.
2.Shmang ushqimet me rrezik të lartë në vapë
Sallatat me majonezë, mishi i pulës i mbajtur jashtë frigoriferit, ushqimet e detit, akulloret nga shitësit ambulantë, apo produktet e pastiçerive që nuk ruhen në temperatura të përshtatshme, janë burime të zakonshme të helmimeve verore.
3.Rregullat e higjienës që nuk duhen anashkaluar
Laji duart para çdo vakti dhe pas përdorimit të tualetit.
Përdor enë të pastra për përgatitjen e ushqimeve.
Mos përdor të njëjtën thikë apo dërrasë për mish të pagatuar dhe për perime.
Mos konsum ushqime me afat të kaluar apo me erë të dyshimtë, edhe nëse “duken” mirë.
4.Pini mjaftueshëm ujë dhe qëndroni të hidratuar
Helmimi shpesh shoqërohet me humbje të lëngjeve. Gjatë verës, dehidratimi mund të përkeqësojë gjendjen. Pini ujë të pastër dhe shmangni pijet me sheqer të lartë ose alkoolin nëse ndiheni keq.
Kur të shkosh te mjeku?
Nëse simptomat zgjasin më shumë se 2 ditë, janë shumë të forta, ose ka shenja dehidratimi të theksuar (gojë e thatë, rrahje të shpejta të zemrës, urinim i rralluar), mos humb kohë: konsulto një mjek. Më mirë një kontroll më shumë se sa një rrezik i panevojshëm!
Si përfundim:
Vera është stina e relaksit, por duhet të jemi të kujdesshëm që ajo të mos shndërrohet në një stinë shqetësimesh për shëndetin. Me pak vëmendje në ushqim, ruajtje dhe higjienë, mund të parandalojmë shumicën e rasteve të helmimit.
Kujdesi për trupin është kujdes për mirëqenien tonë të përditshme. Mos e neglizho!
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
