Artikuj të ndryshëm shpesh ofrojnë lista praktike të “shenjave” që tregojnë se keni një partner besnik, nga sjellja me telefonin celular deri te përfshirja në planet e ardhshme. Megjithatë, psikologjia e marrëdhënieve thellohet përtej këtyre treguesve sipërfaqësorë. Ajo sugjeron se besnikëria e vërtetë buron nga një lidhje emocionale e thellë dhe një model i shëndetshëm i sjelljes së lidhjes, duke e shndërruar partnerin në një “strehë të sigurt”, sipas teorive të themeluara nga autorë si John Bowlby dhe Mary Ainsworth.
Ky artikull analizon se cilat janë shenjat e besnikërisë, jo thjesht si shmangie e tradhtisë, por si një dëshmi e investimit të qëndrueshëm psikologjik në lidhje, bazuar në koncepte të mirëfillta të fushës.
1.Qëndrueshmëria dhe stili i lidhjes së sigurt
Sipas Teorisë së Lidhjes, mënyra se si lidhemi në fëmijëri me kujdestarët tanë (modeluar nga Bowlby), përcakton stilin tonë të lidhjes në marrëdhëniet romantike të moshës madhore.
Shenja Psikologjike: Partneri besnik shfaq një Stil Lidhjeje të Sigurt. Ky stil përkthehet në qëndrueshmëri. Autorë si Dr. Chris Armstrong dhe psikologë të tjerë, theksojnë se një partner besnik shfaq ndjenja të qëndrueshme dhe sjellje të besueshme në kohë. Kjo do të thotë se ata nuk kanë luhatje të forta emocionale dhe nuk zhduken sapo hasin vështirësi. Individët me lidhje të sigurt, në krahasim me ata me lidhje ankthioze apo shmangëse (të cilët studimet i lidhin me një rrezik më të lartë të tradhtisë në martesë), kanë besim në stabilitetin e marrëdhënies dhe nuk kanë nevojë të kërkojnë ngushëllim apo konfirmim seksual jashtë saj.
2.Hapja emocionale dhe pranueshmëria
Besnikëria matet me aftësinë e çiftit për të qenë emocionalisht të ekspozuar dhe të vërtetë me njëri-tjetrin.
Shenja Psikologjike: Transparenca Emocionale dhe Komunikimi i Hapur. Një nga shenjat më të cituara në artikujt rreth partnerit besnik është se ata janë “të sinqertë me ju për gjithçka” dhe janë “emocionalisht të hapur”. Nga këndvështrimi psikologjik, kjo hapje nuk lidhet vetëm me mosmbajtjen fshehtë të telefonit. Ajo lidhet me aftësinë për të ndarë mendimet, dëshirat dhe dobësitë (vulnerabilitetin) – një tregues i thellë i besimit. Një partner i besnik nuk frikësohet t’i thotë të vërtetën partnerit, sepse e sheh atë si një mbështetje, jo si një gjykatës.
3.Përballja e stresit si njësi
Vlera e vërtetë e një partneri besnik shfaqet jo në ditët e mira, por kur jeta bëhet sfiduese, siç e pohon psikologu Mark Travers.
Shenja Psikologjike: Qëndrimi i Qetë dhe i Pranishëm në Krizë. Artikujt profesionalë vënë në dukje se partneri besnik “qëndron i qetë edhe kur ne nuk jemi” dhe “nuk e rrit tensionin me reaktivitet”. Kjo tregon se ata funksionojnë si sistem rregullimi për partnerin tjetër. Ata nuk thonë “Qetësohu,” por “Jam këtu,” duke krijuar një ndjenjë sigurie që parandalon kërkimin e strehës emocionale (apo seksuale) jashtë marrëdhënies. Kjo aftësi për të ruajtur qetësinë dhe për t’u bërë një “strehë e sigurt emocionale” është treguesi më i fortë i angazhimit afatgjatë dhe besnikërisë.
4.Respektimi i kufijve dhe përparësia
Një partner besnik e mbron marrëdhënien në mënyrë aktive, duke e vendosur atë në qendër të prioriteteve.
Shenja Psikologjike: Vendosja e kufijve të respektueshëm dhe prioritizimi i lidhjes. Artikujt theksojnë se partneri besnik “respekton kufijtë tuaj” dhe “ju përfshin në të gjitha sferat e jetës së tyre”. Në terma psikologjikë, kjo do të thotë se ata nuk janë kontrollues apo xhelozë pa arsye, por përkundrazi, ndërtojnë një marrëdhënie ku të dy partnerët ruajnë individualitetin e tyre. Respekti vlen edhe për botën e jashtme: një partner besnik “vendos kufij të qartë me miqtë” ose situatat e jashtme, duke mbrojtur intimitetin e përbashkët si një akt të vetëdijshëm besnikërie.
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
