Përgatiti Esmeralda Birçaj, eksperte e shëndetit mendor
Si do të ndiheshit nëse do të ishit në një dhomë të verdhë? Çfarë ndjenjash ju ngjall e kuqja dhe sa të qetë do të ndiheshit në një hapësirë të gjelbër? Çfarë simbolizon e bardha për ju dhe sa trishtim mund t’ju shkaktojë bluja?
Mund t’ju duket e çuditshme, por një nuancë e thjeshtë ngjyrash ka aftësinë të ndikojë menjëherë në të gjithë psikikën tuaj, duke ndryshuar jo vetëm mënyrën se si silleni, por edhe të gjithë gatishmërinë tuaj.
NGJYRA E VERDHË
E verdha është një ngjyrë intensive që ofron efekte të shumta në psikologjinë njerëzore. Fillimisht, ajo ka aftësinë për të rritur produktivitetin dhe aktivitetin fizik, pasi rrit metabolizmin. Gjithashtu, është ngjyra më tërheqëse-e dukshme e të gjithë paletës së ngjyrave dhe pikërisht për këtë e gjejmë në tabela rrugore apo reklama. Megjithatë, kjo ngjyrë e veçantë lidhet drejtpërdrejt me zemërimin dhe xhelozinë. Eksperimentet e lidhura kanë treguar se njerëzit që ishin në një dhomë të verdhë, u zemëruan ose humbën durimin shumë më lehtë. Duket se ka një efekt të ngjashëm te fëmijët, pasi është vënë re se foshnjat e rrethuara me mure të verdha priren të qajnë më shumë.
NGJYRA E KUQE
E kuqja është e vetmja ngjyrë që mund të nxjerrë në pah dy emocione krejtësisht të kundërta. Nga njëra anë, ajo jep elemente të seksualitetit intensiv, pasionit ose rritjes së libidos erotike. Nga ana tjetër, mund të marrë një formë agresioni, fuqie dhe zemërimi. Vlen të theksohet se e kuqja tërheq sytë në fraksione të sekondës dhe pikërisht për këtë sinjalet paralajmëruese apo sinjalet e rrezikut kanë nuancën e kuqe, për t’i dhënë mendjes një mesazh vigjilence.
NGJYRA E GJELBËR
E gjelbërta si ngjyrë lidhet kryesisht me natyrën dhe shpresën. Në shoqëritë moderne kryesisht shprehet si një ngjyrë qetësie dhe sigurie. Pikërisht për këtë arsye, spitalet, klinikat, madje edhe veshjet kirurgjikale të mjekëve janë bërë me ngjyrë jeshile, jo vetëm për të krijuar një mjedis të qetë për pacientët me stres, por edhe për të ndihmuar në lehtësimin e dhimbjeve.
NGJYRA E BARDHË
E bardha si ngjyrë mund të ketë interpretime të ndryshme, në varësi të këndvështrimit të çdo personi. Nga njëra anë mund të ndikojë në psikologjinë e individëve dhe t’i bëjë ata të ndihen të frymëzuar dhe të qetë, nga ana tjetër mund të krijojë një ndjenjë zbrazëtie ose sikleti. Versioni i ndryshëm që mund të marrë nga kultura të ndryshme është i jashtëzakonshëm. Për shembull, në disa popuj ajo simbolizon pastërtinë dhe optimizmin, ndërsa në popuj të tjerë zi.
NGJYRA BLU
Bluja i përket kategorisë së ngjyrave më të dashura të popullsisë botërore. Truri i njeriut, duke koduar ngjyrën specifike, percepton valët e qetësisë, relaksimit dhe paqes. Përveç kësaj, ajo jep prestigj dhe stabilitet, si dhe rrit kreativitetin e mendjes. Megjithatë, është një ngjyrë dëshpëruese që reflekton melankolinë. Nuk është rastësi që shprehja “I feel blue” apo zhanri i muzikës “blues” i referohen kësaj ngjyre të veçantë, pasi ato japin një notë trishtuese.
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
