Të shërohesh pas një ndarjeje mund të ndjehet si një sfidë e vështirë. Megjithatë, falja dhe shmangia e kontakteve të panevojshme janë hapa kyç për ta lënë pas të kaluarën dhe për të rifituar paqen me veten.
Pas përfundimit të një lidhjeje, është normale të ndjesh një përzierje emocionesh të forta, trishtim për atë që mund të kishte qenë, zemërim nëse ndarja ka qenë e dhimbshme, apo vetmi nëse ende ke ndjenja për atë person. Mund të dëshirosh t’i zhdukësh këto ndjesi menjëherë, por kalimi i ish-it kërkon kohë, durim dhe punë me veten.
Mos u shqetëso nëse ky proces zgjat më shumë seç ke menduar, secili shërohet me ritmin e vet. Edhe pse kujtimet mund të mbeten pjesë e historisë tënde, ti mund të zgjedhësh të ecësh përpara dhe të ndërtosh një jetë të re për veten.
Nuk ka një recetë të saktë për të gjithë, por ka disa strategji që mund të të ndihmojnë ta kapërcesh këtë periudhë. Më poshtë janë 13 këshilla që mund të të udhëheqin në këtë rrugë shërimi:
1.Prano ndjenjat e tua
Emocionet pas një ndarjeje janë të luhatshme – një ditë je mirë, ditën tjetër ndihesh i zbrazët. Mos i shtyp ndjenjat, por jepu hapësirë. Lejoje veten të ndjesh trishtim, zemërim, nostalgji – por vendos kufij që këto emocione të mos të të paralizojnë. Pranimi është hapi i parë drejt çlirimit emocional.
2.Jepi kohës kohë
Çdo person ka ritmin e vet për të shëruar. Mos e krahaso veten me të tjerët dhe mos u bëj presion. Në vend që të mendosh sa do të zgjasë dhimbja, përqendrohu tek ajo që mund të bësh për ta kaluar këtë periudhë më me lehtësi.
3.Shmang kontaktin e panevojshëm
Nëse nuk është e domosdoshme, shmang telefonatat, mesazhet apo takimet me ish-in. Vendos kufij të shëndetshëm për të mbrojtur veten. Nëse keni miq të përbashkët, kërkoji atyre të mos ndajnë informacione që mund të të lëndojnë apo të të kthejnë pas.
4.Shkëputu nga rrjetet sociale
Mos e lejo veten të kontrollosh profilin e ish-it. Shmang krahasimin e jetës tënde me atë që shfaqet në rrjetet e tij. Fshije ose bllokoje përkohësisht nëse është e nevojshme, që të krijosh distancën emocionale që të duhet për t’u shëruar.
5.Rrethohu me njerëz që të mbështesin
Kalimi i kësaj periudhe bëhet më i lehtë kur je i/e rrethuar nga njerëz që të dëgjojnë dhe të përkrahin. Kaloni kohë me miq e familjarë, qoftë për të folur për ndarjen apo thjesht për t’u argëtuar dhe për t’u ndjerë më mirë.
6.Bëj një listë me arsyet pse duhet të ecësh përpara
Shkruaj çfarë nuk shkonte në marrëdhënie dhe pse nuk ishte e duhura për ty. Kjo të ndihmon të shohësh realitetin më qartë dhe të mos idealizosh atë që ishte. Mbaje listën diku ku mund ta shohësh shpesh për të të kujtuar veten pse është mirë që ka përfunduar.
7.Përqendrohu tek vetja
Tani është koha për t’u rikthyer tek vetja dhe pasionet e tua. Provo aktivitete që të kanë munguar, mëso diçka të re, rikthehu tek hobet. Përmes tyre, do të rindërtosh vetëvlerësimin dhe do të rifitosh kontrollin mbi jetën tënde.
8.Lejo veten të ndjesh nostalgji, por mos u blloko aty
Nostalgjia është njerëzore. Nëse të kujtohet një moment i bukur, përjetoje pa faj, por mos u zhyt në të. Ndrysho playlistën, ndrysho rutinën, dhe gjej mënyra të reja për të jetuar pa ndaluar në të kaluarën.
9.Mos u fut në një lidhje të re thjesht për të harruar
Të fillosh një lidhje të re vetëm për të mbuluar boshllëkun nuk është zgjidhje. Mund të përfundosh duke u lënduar më shumë. Jepi vetes kohë të kuptosh çfarë do me të vërtetë dhe të ndërtosh një marrëdhënie të re me një themel të shëndetshëm.
10.Mos kërko fajtor
Të fajësosh veten ose ish-in nuk do të të ndihmojë. Reflekto, mëso nga përvoja, dhe përpiqu të kuptosh çfarë mund të përmirësosh në të ardhmen, pa u fiksuar tek e shkuara.
11.Falu për të çliruar veten
Falja nuk është për të tjerët, është për veten. Të çliron nga hidhërimi dhe të lejon të ecësh përpara. Nuk do të thotë të harrosh çfarë ka ndodhur, por të vendosësh që nuk do ta lejosh më të ndikojë tek ty.
12.Kërko ndihmë profesionale nëse ke nevojë
Nëse dhimbja nuk largohet dhe ndihesh i/e bllokuar, mos hezito të kërkosh ndihmë nga një psikolog. Ata mund të të ndihmojnë të kuptosh ndjenjat e tua dhe të zhvillosh aftësi përballuese.
13.Ji i duruar me veten
Shërimi nuk është një vijë e drejtë, ka ditë të mira dhe të këqija. Kur duket sikur po kthehesh pas, kujto që është pjesë e procesit. Mos u ndëshko për emocionet që ndien. Bëj një hap njëherësh dhe trajto veten me dashuri.
Fundi i një lidhjeje nuk është fundi i historisë tënde. Është fillimi i një kapitulli të ri, ku ti je protagonisti kryesor.
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
