A mund të ndryshosh mënyrën se si e sheh jetën brenda një dite? Mund të duket idealiste, por në fakt, 24 orë janë të mjaftueshme për të mbjellë fara të reja në mendjen dhe shpirtin tënd. Psikologjia pozitive dhe praktikat e zhvillimit personal na mësojnë se ndryshimi i këndvështrimit nuk është rezultat i fatit apo ndodhive të jashtme, por një akt i vetëdijshëm, një zgjedhje që fillon nga brenda.
Një filozof ka thënë: “Nëse pesimizmi është i lidhur me humorin, optimizmi ka të bëjë me vullnetin.”
Me fjalë të tjera, ndonëse ndjenjat negative mund të na kaplojnë spontanisht, zgjedhja për të parë të mirën, për të reaguar me shpresë dhe për të ndërtuar një jetë më të gëzueshme, kërkon punë të qëndrueshme dhe guxim. Në vijim, disa ushtrime dhe teknika që mund t’i praktikosh përgjatë një dite të zakonshme për të ushqyer mendimin pozitiv dhe për të ndryshuar mënyrën si e përjeton jetën.
1.Zgjohu me një pyetje kuptimplotë
Shmang tundimin për të marrë telefonin sapo hap sytë. Në vend të kësaj, pyet veten: “Çfarë është një gjë e bukur që mund të përjetoj sot?” Kjo e vendos trurin në një gjendje pritjeje pozitive dhe e ndihmon të filtrojë përvojat me një lente mirënjohjeje e shprese.
2.Mirënjohja e mëngjesit, 3 gjëra të vogla që vlen t’i vlerësosh
Merr pak minuta për të shkruar ose menduar 3 gjëra për të cilat je mirënjohës. Nuk ka nevojë të jenë të mëdha, një filxhan kafe, një mesazh nga një mik, shëndeti yt. Kjo praktikë ndihmon në rritjen e hormoneve të mirëqenies dhe ul stresin.
3.Bëj një akt të vogël dashamirësie
Një nga mënyrat më të fuqishme për të ndryshuar gjendjen shpirtërore është t’u shërbesh të tjerëve. Mund të jetë një kompliment i sinqertë, një mesazh për dikë që nuk ke folur prej kohësh, apo edhe një ndihmë simbolike për dikë në nevojë. Dashamirësia rrit ndjesinë e kuptimit dhe lidhjes me botën.
4.Lëviz trupin, jo vetëm për shëndetin fizik
Lëvizja, qoftë një shëtitje e shkurtër, disa ushtrime të lehta apo vallëzim i lirë, ndihmon në çlirimin e endorfinave, hormonet e lumturisë. Trupi dhe mendja janë të lidhura ngushtë: kur kujdesesh për trupin, ndihmon edhe gjendjen emocionale.
5.Pusho për 5 minuta me vetëdije të plotë
Shpesh ditët tona janë të mbushura me zhurmë e shpejtësi. Merr një pauzë të shkurtër për të mbyllur sytë, për të ndjekur frymëmarrjen dhe për të ndier trupin në qetësi. Kjo ushtron vëmendjen e vetëdijshme, që ul ankthin dhe rrit ndjenjën e qartësisë mendore.
6.Transformo një mendim negativ në një pyetje ndihmuese
Kur të kap veten duke menduar diçka si: “Nuk do t’ia dal sot”, ndalo për një moment dhe pyet:
“Po nëse e shoh si një mundësi për të mësuar diçka të re?” Ky riformulim ndihmon në rikthimin e kontrollit dhe hapësirës për optimizëm.
7.Në fund të ditës: Reflekto me një qëllim
Para se të shkosh në shtrat, merr disa minuta për të reflektuar mbi ditën. Bëj pyetje si:
Çfarë bëra mirë sot? Çfarë mësova për veten? Çfarë dua të përmirësoj nesër? Ky reflektim të ndihmon të rritesh në mënyrë të qëndrueshme dhe të shohësh përmirësimet e vogla që shpesh kalojnë pa u vënë re.
Optimizmi është një praktikë, jo një dhuratë
Të shohësh jetën ndryshe nuk do të thotë të injorosh vështirësitë, por të zgjedhësh të mos mbetesh peng i tyre. Psikologjia pozitive nuk është një recetë për të qenë i lumtur në çdo moment, por një ftesë për të ndërtuar qëndrueshmëri mendore, për të gjetur kuptim në përditshmëri dhe për të kultivuar një marrëdhënie më të shëndetshme me veten.
Brenda një dite, me ushtrime të vogla, por të qëndrueshme, mund të mbjellësh farat e një këndvështrimi të ri. E nesërmja, ndoshta, do të lulëzojë ndryshe.
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
