Si të hamë shëndetshëm

Një dilemë e vjetër sa dhe njerëzimi, një sfidë e përhershme e kohës, mënyrave të ushqyerjes dhe stilit të jetës. Megjithatë, dietologët janë në garë të vazhdueshme me alternativat dhe zbulimet më të fundit të kërkuesve shkencorë të fushës. Anila Kalleshi, me përvojë të gjatë në këtë drejtim, ka mundur t’i kthejë buzëqeshjen shumë vajzave që kishin humbur besimin për të pasur forma perfekte trupore përmes një regjimi të shëndetshëm ushqimor. Kësaj sfide ajo i është përgjigjur disa herë me fakte dhe dëshmi përmes personazhesh të ndryshëm publikë. Por si ta kuptojmë të gjithë këtë? Anila Kalleshi ka metodën e saj. Ajo thotë se fillimisht duhet të përcaktojmë kaloritë që duhet të konsumojmë në një ditë. Sipas saj, “mesatarja për një grua është rreth 2000 kalori në ditë, por nevojat për kalori mund të ndryshojnë në mënyrë dramatike si – pas mënyrës së jetës që ju bëni dhe sa aktive është ajo. Nga 20-50% e nevojave tuaja ditore për kalori janë të përcaktuara nga veprimtaria fizike. Pjesa tjetër shpenzohet nga funksionet e tjera bazë të organizmit, si: frymëmarrja, qarkullimi i gjakut dhe funksionimi i qelizave”.

Anila Kalleshi
Dietologe

Frutat dhe perimet, a janë ato më ushqyeset?

Secili nga ne e ka të nevojshme të konsumojë një shumëllojshmëri frutash dhe zarzavatesh çdo ditë për të përfituar maksimumin e lëndëve ushqyese. Ndaj mos ngurroni të ushqeheni ndryshe dhe në mënyrë të pasur. Nëse ju parapëlqeni zarzavatet, hidhini një sy dietës së mëposhtme: Brokoli është burim i pashtershëm me vitaminë C, betakarotenë, acid folik, hekur dhe potas. Përmban gjithashtu përbërës të quajtur indolë, që ndihmojnë në parandalimin e kancerit. Mund t’i konsumoni të freskëta apo në mikrovalë, sepse po të ziejnë, ato i humbasin vlerat që ofron vitamina C. Shpargujt janë një ushqim çudibërës me veti të spikatura mjekësore. Janë të pasur në acid folik dhe vitamina C, E dhe betakarotenë. Lakra e bardhë, një ushqim i pasur në vitamina C, K, E dhe potas. Përmban gjithashtu betakarotenë, fibra, tiaminë dhe të tjera substanca për parandalimin e kancerit.

Po fast food – et ndikojnë për keq ?

Chips (patatet e fërguara) kanë vitaminë C dhe milkshake-t përmbajnë kalcium, por mos kaloni në eufori, sepse disa fast food-e shtojnë sheqerna në patatet e tyre të fërguara, si dhe yndyrna në hot dog-e dhe në byrekët me mish. Disa nga ushqimet e tyre mund të përmbajnë më shumë se 20 lugë sheqerna dhe disa përmbajnë më shumë se gjysma e sasisë ditore të kripës që ju duhet të merrni. Fast food-i është vërtet i keq për shëndetin tuaj nëse ju ekskluzivisht merrni ushqime të fërguara dhe të shtuara me yndyrna dhe sheqerna.

Tri vakte të shëndetshëm

• Një mëngjes i mirë mund të kontribuojë në dietën tuaj ditore duke ju dhënë kalori të mjaftueshme, disa proteina, një sasi të arsyeshme të karbohidrateve komplekse, pak yndyrna dhe shumëllojshmëri vitaminash dhe substancash minerale. Shumë njerëz nuk tolerojnë sasi të mëdha kalorish në mëngjesin e tyre, por sasia ideale do të ishte 400 deri 500 kalori në mëngjes për gratë dhe 550–650 kalori për burrat. Një mëngjes ideal do të ishte një kos biologjik me pak yndyrë, i përzier me një banane. Pastaj një gotë lëng portokalli shoqëruar me një copë bukë të zezë të thekur me mjaltë. Ose provoni një gotë përzierje me ujë, qumësht, dy lugë mjaltë, një lugë rrush të thatë dhe një gotë lëng portokalli dhe në fund një copë bukë të zezë të thekur.

• Dreka duhet të jetë në ekuilibër të plotë midis karbohidrateve, proteinave dhe pak yndyrna. Kjo sepse vakti juaj i mbrëmjes, nëse është i pasur me karbohidrate, do të përmbajë edhe një sasi të madhe të proteinave ditore që ju mund të merrni. Nëse merrni sasi të madhe karbohidratesh gjatë drekës, rrezikoni një pasdite të plogësht. Rekomandohet sallatë me ton dhe domate të freskëta, një pjatë makarona dhe një mollë në vend të ëmbëlsirës. Ose provoni thjerrëzat dhe një supë zarzavatesh me pak bukë të thekur, si dhe në fund një portokall.

• Është momenti më i përshtatshëm për të konsumuar pak karbohidrate sepse këto japin një efekt qetësues, relaksim dhe ndihmojnë gjumin e natës. Zgjidhni një vakt të pasur me karbohidrate, si drithërat, makaronat, patatet ose bishtajat, që do t’ju mbajnë edhe gjatë natës. Provoni një zog të pjekur me patate të reja me gjalpë, bizelet, sallatat e murrme, orizin, kajsitë dhe arrat apo frutat e shoqëruara me kos.

Artikuj të ngjashëm