Të jetojmë mirë dhe më gjatë, duke mbrojtur zemrën është një nga qëllimet që i kemi vënë vetes, duke zgjedhur një dietë të shëndetshme dhe të ekuilibruar. Sipas disa studimeve, në këtë këndvështrim nuk duhet të heqim dorë nga specat djegës. Ky ushqim duket se ka veti të dobishme, ndër të cilat spikat veprimi mbrojtës kundër sistemit kardiovaskular.
Studiuesit nga Cleveland Clinic’s Heart, Vascular & Thoracic Institute kanë marrë në konsideratë mbi 4700 studime të kryera mbi efektet e specave djegës në shëndetin tonë, duke analizuar pesë nga bazat e të dhënave kryesore shëndetësore globale (Ovid, Cochrane, Medline, Embase dhe Scopus). Ata gjithashtu përfshinë në meta-analizën e tyre të dhënat shëndetësore dhe zakonet dietike të mbi 570 mijë njerëzve nga Shtetet e Bashkuara, Italia, Kina dhe Irani për të nxjerrë në pah ndryshimet midis atyre që zakonisht përfshijnë specin djegës në dietën e tyre dhe atyre që e përdorin rrallë atë.
Rezultatet e këtij studimi paraprak, i cili do të paraqitet në sesionet shkencore të vitit 2020 të Shoqatës Amerikane të Zemrës, janë mjaft inkurajuese: një ulje prej 26% e rrezikut të vdekshmërisë kardiovaskulare dhe kancerit u gjet tek konsumatorët e rregullt të specit djegës dhe ulje e rrezikut prej 25% të vdekshmërisë nga të gjitha shkaqet. Sigurisht, siç specifikohet nga Dr. Bo Xu, një kardiolog i Klinikës Cleveland që drejtoi studimin, nevojitet konfirmim i mëtejshëm shkencor.
Ka shumë hulumtime që janë kryer për të analizuar efektet e dobishme të këtij ushqimi. Në fakt, specat djegës kanë disa veti interesante terapeutike: sipas një studimi të botuar në Cellular Signaling, për shembull, ato kanë një veprim të rëndësishëm anti-inflamator, duke ulur kështu rrezikun e shfaqjes së sëmundjeve të ndryshme, përfshirë edhe disa kancere.
Një përmbledhje, rezultatet e së cilës u botuan në Appetite, nxori në pah rolin e saj në humbjen e peshës. Specat djegës janë përgjegjës për zvogëlimin e oreksit, si dhe për të stimuluar termogjenezën. Përveç kësaj, studime të mëtejshme kanë zbuluar se si ky ushqim kryen një veprim antioksidues dhe lehtësues të dhimbjeve, zvogëlon rrezikun e zhvillimit të sëmundjeve të ndryshme dhe ngadalëson rënien e funksioneve njohëse.
Përgjegjës për këto virtyte të dobishme është kapsaicina, përbërësi përgjegjës për shijen pikante dhe intensive të specave djegës. Mekanizmat e veprimit të saj nuk njihen ende plotësisht, por shkencëtarët kanë treguar se kjo substancë lidhet me receptorët e dhimbjes, duke nxitur lirimin e hormoneve të afta për të ulur presionin e gjakut, për të përmirësuar metabolizmin dhe për të nxitur tretjen.
Burimi / https://dilei.it/
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
