Sipas një studimi, gratë janë në një rrezik më të lartë për të përjetuar mosfunksionim seksual kur pinë alkool.
Mosfunksionimi seksual i referohet problemeve që parandalojnë një përvojë të kënaqshme seksuale dhe mund t’u ndodhë si meshkujve ashtu edhe femrave. Hulumtimet e mëparshme sugjerojnë se rreth 40% e grave përjetojnë mosfunksionim seksual.
Ka disa faktorë rreziku për mosfunksionimin seksual të femrave, duke përfshirë obezitetin, diabetin, përdorimin e drogës, pirjen e duhanit dhe konsumimin e zgjatur të alkoolit. Përdorimi i alkoolit, duke përfshirë abuzimin me alkoolin, është mjaft i zakonshëm në shoqërinë e sotme dhe mund të ketë një ndikim të rëndësishëm në sjelljen seksuale. Ky studim synon të bashkojë kërkimet ekzistuese mbi marrëdhënien midis përdorimit të alkoolit dhe mosfunksionimit seksual tek gratë.
Studimet që u përdorën në këtë meta-analizë duhej të raportonin efektin e alkoolit në mosfunksionimin seksual të grave. Rishikimet, studimet e rasteve dhe studimet e përsëritura u përjashtuan. Përfundimisht, 7 studime u përfshinë në këtë meta-analizë, të cilat përfaqësonin një madhësi kampioni prej 50,225 femrash.
Rezultatet treguan se gratë që konsumonin alkool kishin 74% më shumë gjasa të përjetonin mosfunksionim seksual në krahasim me gratë që nuk pinin alkool. Raportet e gjasave të raportuara në studime varionin nga 0.69 në 7.62, dhe prevalenca e mosfunksionimit seksual varionte nga 12% në 63%. Studime të shumta treguan se përdorimi i alkoolit ishte një parashikues i mosfunksionimit seksual.
“Gjetjet e këtij studimi tregojnë se konsumimi i alkoolit mund të rrisë gjasat e mosfunksionimit seksual tek gratë me 74%,” thane studiuesit.
“Meqenëse një funksion i shëndetshëm seksual është thelbësor për një cilësi të mirë jete, politikëbërësit mund të konsiderojnë përdorimin e rezultateve të kësaj meta-analize si një prioritet kërkimor për të rritur ndërgjegjësimin e grave për efektet e dëmshme të alkoolit në performancën e tyre seksuale. Kjo mund të zvogëlojë konsumin e alkoolit dhe efektet anësore të lidhura, duke përfshirë mosfunksionimin seksual,” përfunduan studiuesit.
K.M / Burimi Psypost
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
