Marrja e acidit dokozaheksaenoik (DHA), një përbërës i grupit të omega-3, nxit prodhimin e molekulave që ndihmojnë në reduktimin e inflamacionit kronik – një nga faktorët që mund të përshpejtojnë përparimin e tumoreve. Një ushqyerje e pasur me acide yndyrore omega-3 mund të përbëjë një mbështetje të rëndësishme në luftën kundër kancerit të gjirit.
Një studim i ri i zhvilluar nga Universiteti “La Sapienza” i Romës ka sjellë në dritë të dhëna premtuese për efektin pozitiv të DHA-së si terapi ndihmëse krahas trajtimeve tradicionale onkologjike. Hulumtimi është publikuar në revistën shkencore Cancers.
Çfarë është DHA dhe si ndikon?
DHA është një nga omega-3-të më të rëndësishme për shëndetin e njeriut, thelbësore për funksionimin normal të sistemit nervor, kardiovaskular dhe atij imunitar. Kur trupi e përpunon këtë acid, prodhon molekula të quajtura resolvina D1 dhe D2 – substanca që ndihmojnë në eliminimin e inflamacionit sistemik.
Në ndryshim nga ilaçet tradicionale anti-inflamatore, resolvinat veprojnë si “rregullatorë selektivë”: ato ndalojnë inflamacionin e dëmshëm, ndërsa ruajnë atë të domosdoshëm për procesin e shërimit. Kjo veçori është veçanërisht e rëndësishme në trajtimin e kancerit, pasi inflamacioni kronik mund të ndihmojë në rritjen dhe përhapjen e tumoreve.
Zbulimet e studimit
“Kemi vërejtur se tek gratë me kancer të gjirit që mbartin mutacionet BRCA1 dhe BRCA2, pas administrimit të DHA-së, është shënuar një rritje e ndjeshme e niveleve të resolvinave,” – shpjegon prof. Maurizio Muscaritoli, autor i studimit dhe president i Shoqatës Italiane të Ushqyerjes Klinike. “Ndërkohë, te gratë me histori familjare të kancerit, por pa mutacionin gjenetik, kjo rritje nuk u vu re në të njëjtin nivel.”
Në eksperiment, studiuesit përdorën një suplement në formë shurupi me shije luleshtrydheje që përmbante 10% DHA të përftuar nga mikroalgat detare të llojit Schizochytrium – një burim i qëndrueshëm dhe i pastër i omega-3, që nuk kërkon përdorimin e peshkut. Vullnetarët u vlerësuan para fillimit të trajtimit dhe pas 10 ditësh administrimi. Tek pacientët që mbanin mutacionet BRCA1 ose BRCA2 u vu re një rritje prej 185% në nivelin e resolvinës D1 dhe 101% për resolvinën D2.
“Kjo qasje dëshmon se si ushqyerja klinike moderne mund të integrohet me terapitë onkologjike ekzistuese si një mbështetje shtesë që ndikon në mekanizmat molekularë të sëmundjes,” – shton prof. Alessio Molfino, autori kryesor i studimit.
Një hap i ri në luftën kundër kancerit të gjirit
Kanceri i gjirit mbetet forma më e përhapur e neoplazmës tek gratë në mbarë botën. Sipas Organizatës Botërore të Shëndetësisë, çdo vit diagnostikohen rreth 2.3 milionë raste, ndërsa vetëm në Itali raportohen mbi 55 mijë raste të reja në vit. Ky studim hap një rrugë të re në kuptimin e rolit që mund të ketë ushqyerja në menaxhimin dhe trajtimin e kancerit – veçanërisht në kombinim me terapi të avancuara mjekësore.
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
