Me shumë gjasë keni vendosur disa qëllime, si materiale ashtu edhe emocionale, që doni t’i arrini. Por gjatë këtij rrugëtimi, a e praktikoni empatinë? Shpesh jemi aq të përqendruar në nevojat tona të përditshme, sa nuk arrijmë as të shohim të tjerët përreth. Nuk është gabim të investosh energjinë te objektivat e tua, për sa kohë që nuk harron njerëzit që ke pranë.
Empatia është aftësia për të hyrë në lëkurën e tjetrit, për të parë botën me sytë e tij. Ka njerëz që nuk janë të interesuar ta bëjnë këtë, por edhe kur synimet dhe idetë tona ndryshojnë nga ato të të tjerëve, kjo nuk do të thotë se duhet t’i injorojmë. Të jesh empatik të ndihmon të kuptosh më mirë veten dhe botën që të rrethon.
Dëgjimi është baza e empatisë
Sepse empatia fillon me përpjekjen për të parë nga këndvështrimi i tjetrit, hapi i parë është të dëgjosh. Një nga vështirësitë më të mëdha që kemi në komunikim është se shpesh ndërtojmë në mendje përgjigjen e tjetrit, pa i dhënë kohë të shprehet. “Parashikojmë” çfarë do të thotë dhe japim opinionin tonë menjëherë. Empatia kërkon më shumë durim. Duhet të jemi të gatshëm të dëgjojmë me vëmendje dhe plotësisht. Dhe kur vjen radha jonë të flasim, të mendojmë mirë për atë që do të themi. Ky është një ushtrim që kërkon kohë, por që sjell përmirësim të madh në marrëdhëniet tona.
Ndalu, vëzhgo dhe pyet
Sa e lehtë është të krijosh një mendim për gjithçka! E bëjmë vazhdimisht, pa u ndalur të mendojmë pse. Dhe kur këtë e kombinojmë me kohën që kalojmë në telefon ose në rrjete sociale, kuptohet pse bota jonë ka kaq pak empati. Pse të mos ndalemi për një moment për të parë çfarë na rrethon? A kemi vënë re njerëzit pranë nesh? A e dimë çfarë ndiejnë, ëndërrojnë apo duan? Empatia kërkon një moment ndalese dhe reflektimi. Vëzhgoni ata që jetojnë pranë jush. Çfarë tregojnë sjelljet e tyre? Pyeteni veten çfarë po përjetojnë. Kështu do të mësoni t’i kuptoni më mirë, pa pasur nevojë t’ju thonë gjithçka.
Shihni situatat nga një kënd tjetër
Kur debatojmë apo nuk biem dakord me dikë, shpesh i qëndrojmë kokëfortësisht mendimit tonë. Herën tjetër, përpiquni të shihni situatën nga këndvështrimi i tjetrit. Fillimisht nuk do të jetë e lehtë, por me praktikë do të bëhet më natyrale. Pyesni veten: cilat janë arsyet e tij? Çfarë ka ndier? Çfarë ndien tani? Cilat janë frikërat apo dyshimet që e drejtojnë? Këto pyetje do t’ju ndihmojnë të kuptoni më mirë realitetin. Është e lehtë të jetosh duke besuar se vetëm ti ke të drejtë, por mos harroni se edhe pala tjetër mendon njësoj për veten. Empatia na mëson se nuk ka armiq të vërtetë, por vetëm ide të ndryshme që mund të afrohen me pak përpjekje dhe mirëkuptim.
Rëndësia e të parë një botë më të gjerë
Empatia na lejon të shohim botën në gjithë kompleksitetin dhe pasurinë e saj. Edhe nëse tani nuk ju duket e rëndësishme, në të vërtetë jeta jonë është e ndërthurur me të tjerët. Qëllimet, ëndrrat dhe frikërat tona formohen në bashkëjetesë me ta. Të mësosh të shohësh botën me sytë e të tjerëve nuk të bën vetëm më të mençur – por edhe të ndihmon t’i arrish më lehtë qëllimet e tua.
Kur të filloni të kuptoni ata që keni pranë, do të mund t’i ftoni në rrugëtimin tuaj, dhe të lundroni së bashku drejt suksesit. Po ashtu, edhe ju mund të bëheni faktori që ndryshon jetën e dikujt tjetër. Të ndjekësh ëndrrat vetëm është e vështirë; t’i ndjekësh krah për krah me dikë tjetër – është shumë më e lehtë dhe më njerëzore.
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
