Nga fundi i vitit 2020 deri në fund të vitit 2021, vaksinat ndihmuan të shpëtonin afro 20 milionë jetë. Por nëse do të kishim vaksinuar edhe më të varfrit, do të kishte qenë edhe më shumë. Kjo është ajo që del nga një studim i publikuar në The Lancet Infectious Diseases, i cili, përmes një modeli matematikor, vlerësoi vdekshmërinë e mundshme të Covid në një botë pa vaksina. Ana tjetër e medaljes, megjithatë, është se ne nuk kemi bërë mjaftueshëm: nëse do të ishte arritur qëllimi i OBSH-së për të vaksinuar 40% të të gjithë popullsisë së botës deri në fund të vitit 2021, do të ishin shpëtuar edhe 600,000 jetë të tjera.
Studimi mori parasysh të dhënat zyrtare në lidhje me vdekjet e numëruara në 185 vende nga dhjetori 2020 deri në dhjetor 2021. Kina u përjashtua nga analiza për të shmangur shtrembërimin e të dhënave, duke pasur parasysh politikat e tyre të ashpra të bllokimit të zbatuara për një popullsi të tillë.
Studiuesit më pas kryen një analizë të veçantë të vdekjeve të larta në numër, për të përfshirë vdekjet nga Covid që nuk konsideroheshin gjatë periudhës së studimit në llogaritjet. Modeli mori gjithashtu parasysh nivelet e ndryshme të vaksinimit të arritura në vende të ndryshme dhe ndryshimet në efikasitetin e vaksinave të administruara. Pasi këto të dhëna u krahasuan me ato të një bote hipotetike pa vaksina, ekspertët ishin në gjendje të vlerësonin se sa njerëz u shpëtuan, drejtpërdrejt dhe tërthorazi, nga fushata e vaksinimit: duke numëruar vetëm vdekjet “zyrtare”, vaksinat shpëtuan 14.4 milionë njerëz me një ulje prej 79%.
Nëse marrim parasysh edhe vdekjet “të fshehura” (ato që nuk janë numëruar zyrtarisht), numri rritet në 19.8 milionë jetë të shpëtuara nga 31.4 milionë vdekje të mundshme pa vaksina – një ulje prej 63%. Nga këto, 15.5 milionë u shmangën falë efektit të drejtpërdrejtë të vaksinimeve, ndërsa pjesa tjetër falë efektit indirekt, si reduktimi i transmetimit dhe presioni më i vogël në sistemet shëndetësore të vendeve.
Ata që përfituan më shumë nga fushata e vaksinimit ishin vendet me të ardhura të larta dhe të mesme, ku u shmangën 12.2 milionë vdekje. Kjo çon në një pikë të dhimbshme që del nga studimi, domethënë vështirësitë që kanë pasur shumë vende të varfra në aksesin ndaj vaksinave: “Nëse vaksinat do të ishin shpërndarë më shpejt në shumë pjesë të botës, do të mund të ishin shpëtuar më shumë jetë”, bëj me dije studiuesit.
Programi ndërkombëtar Covax ka ndihmuar në shpëtimin e 7.5 milionë jetëve, por rreth një në pesë vdekje mund të ishte shmangur duke vaksinuar 40% të popullsisë së vendeve më të varfra. Faji qëndron tek egoizmi i verbër i Perëndimit, i cili preferoi të arrinte nivele të larta vaksinimi në shtëpi pa llogaritur se vaksina nuk njeh kufij dhe se variante krijohen aty ku virusi qarkullon më lirë.
Përgatiti O.T | Burimi Focus.it
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
