Nga Denata Toçe
Psikologe Këshillimi
Jam nënë, por mbi të gjitha një grua e dëshpëruar. Bashkëshorti im qëndron gjithë ditën mbi kompjuter, qoftë për punë, sepse është programues, por edhe për të kaluar kohën e lirë në rrjetet sociale apo thjesht për të luajtur. Sapo ngrihet në mëngjes, ulet në tryezë për të ngrënë me tablet-in në dorë dhe mandej, me celularin me vete, sa nuk thyen kokën kur del nga shtëpia. Edhe kur është në timon nuk ndahet nga teknologjia. Më thoni, si t’ia dal? Sepse më duket sikur është martuar me kompjuterin dhe jo me mua… Më duket ndonjëherë qesharake, por kjo e vërtetë na është kthyer në sindromë shqetësuese për ne, mua dhe fëmijët.
Përgjigje: Ah, ja dhe një realitet që e ka cenuar marrëdhënien sociale seriozisht vitet e fundit. Teknologjia është sot një e mirë e madhe dhe e domosdoshme, pa diskutim. Vlen të jepemi, informohemi dhe ta përdorim teknologjinë, duke racionalizuar kohën dhe punën në të mirë të shëndetit tonë psikofizik. Çdo e mirë, e cila epshet më shumë, kthehet në një e keqe e pashmangshme dhe shpesh e pakontrollueshme, ndaj vlen të kontrollohet në kohë. Njeriu kërkon në çdo moment, pa e kuptuar, t’i japë kuptim jetës dhe duke u dhënë SHUMË mbas diçkaje, shmangen të gjitha “vogëlsirat” në dukje, por që së bashku bëjnë të gjithë figurën e jetës sonë. Duke iu dhënë shumë diçkaje, si teknologjisë në rastin e bashkëshortit tuaj, mendojmë se arrijmë kuptimin e jetës, sepse kjo është ajo që ne ndihemi të suksesshëm, që dimë të bëjmë më mirë. Por, a është mjaftueshëm? Sigurisht që jo… Juve si bashkëshorte, ju ftoj të kuptoni fillimisht rëndësinë dhe përfitimet që bashkëshorti juaj shikon te teknologjia dhe të ndizeni së bashku me të, në komunikim e pse jo edhe në praktikë, duke u interesuar për “kuptimin” që ai mendon se i ka dhënë jetës. Kështu ju do ta respektoni jetën e tij profesionale, që padashur është kthyer edhe në një stil jetese. Më pas ftojeni të kuptojë se si ndiheni ju në raport me kohën që nuk e keni me atë. Kujdes! Nuk është e nevojshme ta ashpërsoni situatën, duke përcaktuar fajtorin. Është e rëndësishme t’ia komunikoni mendimin tuaj, si ndiheni ju kur nuk e keni atë pranë. Kërkojini mendim se si i duket koha që shpenzon me teknologjinë? Tregojini se e vlerësoni shumë, por a nuk do të ishte më mirë që ta racionalizonte disi kohën që të mund të kalonit kohë së bashku? Kërkojini se çfarë mendon? Kjo është një mënyrë e mirë për të bashkërenditur gjërat dhe për të bashkëndarë komunikimin pa agresivitet, pasi në vetvete edhe bashkëshorti juaj mund të mendojë se ka të drejtë, e thjeshtë po bën punën e tij. Ju mund t’i paraprini kësaj situate.
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
