Stina e verës na fton të dalim më shumë, të udhëtojmë, të ecim në natyrë dhe të shijojmë rrezet e diellit. Por temperaturat e larta që sjell vera nuk janë vetëm kënaqësi – ato mund të ndikojnë drejtpërdrejt në shëndetin tonë nëse nuk marrim masa të thjeshta, por të rëndësishme. Një nga këto masa është hidrimi i duhur.
Pse është kaq e rëndësishme të qëndrojmë të hidratuar?
Kur jemi të ekspozuar ndaj vapës dhe diellit, trupi ynë humbet më shumë lëngje përmes djersës. Kjo rrit rrezikun për dehidrim, që mund të shkaktojë lodhje, dhimbje koke, marramendje dhe në raste më ekstreme, goditje nga nxehtësia. Uji ndihmon në rregullimin e temperaturës trupore, mbron organet dhe ndihmon trupin të funksionojë normalisht gjatë gjithë ditës.
Shenjat e para të dehidrimit që nuk duhen injoruar:
Goja e thatë dhe ndjesia e etjes së vazhdueshme
Urinë me ngjyrë të errët dhe në sasi të vogël
Lodhje dhe përqendrim i dobët
Dhimbje koke ose ndjesi trullimi
Lëkurë e thatë dhe mungesë elasticiteti
Këshilla të thjeshta për të qëndruar të hidratuar
Pini ujë rregullisht, jo vetëm kur ndjeni etje. Mbani gjithmonë me vete një shishe uji.
Shtoni fruta ose perime me përmbajtje të lartë uji në dietën tuaj – si shalqiri, kastraveci, pjepri apo luleshtrydhet.
Shmangni pijet me shumë sheqer, kafeinë ose alkool, sepse mund të nxisin më shumë humbje të lëngjeve.
Nëse bëni ecje të gjata apo ushtrime fizike, kujdesuni të hidratoheni para, gjatë dhe pas aktivitetit.
Vishini rroba të lehta dhe prej materiali që marrin frymë, për të ulur djersitjen e tepërt.
Për shëtitje më të sigurta në vapë:
Nëse planifikoni të dilni për një shëtitje apo udhëtim në natyrë, bëni këtë gjatë orëve më të freskëta të ditës – në mëngjes ose në mbrëmje. Mbani me vete ujë, kapelë, syze dielli dhe mos harroni të përdorni krem mbrojtës ndaj diellit. Kujdesi për trupin tonë nuk duhet të pushojë, edhe kur jemi me pushime!
Mos prisni të ndiheni të etur për të pirë ujë – bëjeni pjesë të zakonit tuaj ditor. Vera është më e bukur kur trupi dhe mendja janë të freskët dhe të kujdesura!
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
