Përgatiti Esmeralda Birçaj, eksperte e shëndetit mendor
Bezdisje dhe kujtime për të përditshmen. “Mos harro të marrësh bukë”; “E ke paguar telefonin?”; “Është radha jote të nxjerrësh plehrat”; “Mos harro të lash bluzën time, më duhet nesër”; “Akoma nuk e ke ndërruar llambën?” etj, etj.,. E kuptoni thelbin, e keni parë shfaqjen… Sigurisht që në njëfarë mase, një familje që të funksionojë është e nevojshme që të dy anëtarët e çiftit të kontribuojnë në punët dhe të kenë një komunikim rudimentar mes tyre se kush dhe çfarë do të bëjë, përndryshe do të ketë kaos! Por kur një anëtar insiston në listat e detyrave, ndërsa anëtari tjetër është më i qetë, atëherë krijohet një çekuilibër në marrëdhënie.
Gradualisht, personi që vazhdon të shtyjë…, ka lista, kërkesa dhe presion ndaj personit tjetër, merr rolin e “të keqit” dhe anëtari tjetër fillon ta shmangë. Shtytësi krijon një atmosferë negative dhe të gjitha dhëniet dhe marrjet e tij me partnerin bëhen negative. Personi që ndjen se është vazhdimisht nën mikroskop, nuk do t’ia dalë sado të përpiqet, sepse e gjithë marrëdhënia bazohet në faktin nëse ka bërë punën që duhet të bëjë…, është i tjetërsuar emocionalisht.
Përdorimi ekskluziv i celularit dhe rrjeteve sociale në vend të bisedës kur çifti është bashkë
Telefoni celular është gati të bëhet një zgjatim i pëllëmbës së dorës sonë. Dhe…, për shumë prej nesh, është një mjet pune. Por kur jemi me partnerin, duke parë vazhdimisht në telefon, duke iu përgjigjur mesazheve, duke parë Facebook-un dhe duke u marrë me telefonin në vend të tjetrit, jo vetëm që është e bezdisshme, por është edhe një shenjë se nuk jemi të interesuar dhe aq shumë për personin përballë nesh duke e vendosur atë në vend të dytë. Sigurisht, disa mesazhe kërkojnë një përgjigje të menjëhershme.
Ka shumë gjëra të tjera që nuk janë urgjente. Na takon neve të bëjmë zgjedhjen dhe t’i kushtojmë partnerit tonë vëmendjen e pandarë kur jemi bashkë për të përcjellë mesazhin “Jam i/e interesuar të investoj në marrëdhënien tonë, kjo është arsyeja pse unë ju dëgjoj, flas me ju dhe ju kushtoj vëmendjen time.”
Ata nuk investojnë në kohë cilësore së bashku
Shumë çifte e gjejnë ekuilibrin në mënyrën se si i ndajnë detyrat dhe si e “drejtojnë” shtëpinë çdo ditë, pa surpriza të pakëndshme si “Kush do t’i marrë fëmijët nga shkolla?”, “Frigoriferi është bosh!”, “Mbaroi letra higjienike” etj. Ky lloj organizimi është i dobishëm dhe i nevojshëm, por nuk është i vetmi element që i duhet një çifti për të qenë mirë. Po aq e rëndësishme (për të mos thënë edhe më e rëndësishme) është që çifti të kalojë një kohë cilësore me njëri-tjetrin në intervale të rregullta.
Nga të mëdhatë dhe të këndshmet, që çifti të shkojë vetëm me pushime për një javë ose një fundjavë deri tek të voglat e përditshme: investimi në zakone pozitive dhe gëzime të vogla: si shikimi i një filmi, shëtitja ose pirja e një kafeje/pijeje. , të fillojnë një hobi së bashku etj. Që dy persona të jenë mirë së bashku, duhet të kalojnë mirë, të kenë momente të lumtura, të këndshme, eksperienca të këndshme… Çiftet duhet të investojnë në kohët e mira në mënyrë që t’u kujtohet në kohë të vështira se “së bashku” është bukur, edhe pse ka vështirësi, probleme dhe detyra.
Kohët e mira të jetës janë një kujtim për anëtarët e çiftit se po kalojnë mirë së bashku, një kujtim përse zgjodhën njëri-tjetrin. Dhe kur çifti është mirë dhe investon kohë në vetvete, atëherë tensionet, pakënaqësitë dhe zënkat reduktohen dhe e gjithë familja ka një atmosferë pozitive!
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
