Një studim i publikuar së fundi ka gjetur se, fëmijët dhe adoleshentët kanë vetëm gjysmën e gjasave krahasuar me të rriturit mbi 20 vjeç që të infektohen me koronavirus, sëmundja e shkaktuar nga virusi Covid-19. Ata zakonisht nuk zhvillojnë simptoma klinike.
Gjetjet mund të ndikojnë tek politik-bërësit të cilët po përballen me vendime të vështira për kur dhe si të rihapin shkollat dhe qendrat e kujdesit ditor. Mësimi në distancë ka qenë sfidues për mësuesit, studentët dhe prindërit, dhe ka presion mbi zyrtarët që të rihapin institucionet arsimore dhe kujdesin ditor për të çliruar prindërit që janë duke punuar dhe duke u kujdesur për fëmijët.
“Këto rezultate kanë implikime për efektivitetin e mundshëm të mbylljes së shkollave në zbutjen e transmetimit SARS-CoV-2, me qëllim që këto të jenë më pak efektive sesa për infeksionet e tjera të frymëmarrjes,” shkruajnë autorët, që punojnë në “London School of Hygiene & Tropical Medicine”.
Studimi gjithashtu ka implikime për barrën e mundshme të sëmundjes në vendet me popullsi shumë më të re, shumë prej të cilave janë në botën në zhvillim. Shumica e vendeve të goditura më shumë nga koronavirusi kanë pasur popullsi relativisht të vjetër. Që nga fillimi i pandemisë, dihet që fëmijët zakonisht janë kursyer nga efektet më të këqija të sëmundjes. Ata rrallë vdesin prej saj. Por ata ende mund të sëmuren dhe mund të përhapin virusin, duke përfshirë këtu anëtarët e moshuar të familjes që kanë më shumë gjasa të kenë një manifestim të rëndë të sëmundjes.
Arsyet për efektin dukshëm mbrojtës të të rinjve nuk janë kuptuar qartë. Një teori e zakonshme – e vërejtur nga autorët e studimit të ri – është se ulja e ndjeshmërisë ndaj infeksionit ose sëmundjes serioze tek fëmijët mund të “rezultojë nga mbrojtja imunitare nga koronaviruset e tjera”, ose t’i atribuohet infeksionit të fundit nga viruse të tjera të frymëmarrjes si p.sh. gripi.
Studimi, i botuar në revistën “Nature Medicine”, merr në studim gjashtë kombe: Kanadanë, Kinën, Italinë, Japoninë, Singaporin dhe Korenë e Jugut. Studiuesit zhvilluan modele matematikore për të interpretuar modelet demografike të rasteve të Covid-19 në ato vende.
Deri më tani, ka pasur prova të përziera në lidhje me infeksionet midis fëmijëve. Një studim nga Shenzhen, Kinë, botuar në prill zbuloi se, brenda familjeve, fëmijët kishin të ngjarë të infektoheshin si të rriturit. Një studim i veçantë nga Kina nuk gjeti ndonjë ndryshim midis djemve dhe vajzave në shkallën e infeksionit.
Raporti i ri, megjithatë, vlerëson se fëmijët kanë vetëm gjysmën e gjasave për t’u infektuar. Kur ato ndodhin, ato zakonisht mbesin asimptomatikë ose kanë simptoma të buta. Sipas autorëve, në mesin e njerëzve mes moshës 10 dhe 19 vjeç të infektuar me virusin SARS-CoV-2 vetëm 21% tregojnë simptoma, krahasuar me 69% në mesin e njerëzve më të vjetër se 70 vjeç.
“Ne zbuluam se ndërhyrjet që synojnë fëmijët mund të kenë një ndikim relativisht të vogël në zvogëlimin e transmetimit SARS-CoV-2, veçanërisht nëse transmetimi i infeksioneve subklinike është i ulët,” shkruajnë studiuesit.
Autori kryesor Nicholas Davies vuri në dukje se mbyllja e shkollave është një çështje e ndërlikuar: “Mbylljet e shkollave ende kanë një efekt – ne nuk po themi se ato janë plotësisht joefektive. Pra, me të vërtetë, kjo thjesht thekson se sa e vështirë është çështja se kur duhen të rihapen shkollat. Ashtu si me shumë politika të tjera, nuk është një pyetje e drejtpërdrejtë e epidemiologjisë.”
Studiuesit zbuluan se fëmijët ishin 35 deri në 60% më pak të ndjeshëm ndaj infeksionit koronavirus sesa të rriturit e moshës 20 vjeç e lart. Kjo gamë statistikore pasqyron pasigurinë në të dhënat që futen në modelin matematikor, tha ai. Gjetjet vijnë pasi shtetet dhe sistemet shkollore konsiderojnë se kur dhe si të rihapin shkollat këtë vjeshtë.
Ajo që studimi nuk përgjigjet është shkalla në të cilën fëmijët, përfshirë ata pa simptoma, mund të transmetojnë virusin. Ky është një faktor kryesor në mbylljen e shkollave: Edhe nëse fëmijët si grup kanë më pak të ngjarë të sëmuren seriozisht nga sëmundja, mësuesit e tyre dhe punonjësit e tjerë të rritur në shkollë janë në grupe të moshës me rrezik më të lartë për tu infektuar.
Zyrtarët gjithashtu janë shqetësuar se fëmijët mund ta kalojnë virusin te një anëtar i familjes në shtëpi. Çfarëdo hulumtimi që tregon se fëmijët janë nën rrezik relativisht të ulët prej virusit, është një rehati që mund tu japi shkollave për të punuar për rihapjen e objekteve arsimore me shpresë këtë vjeshtë.
Shumë sisteme po shqyrtojnë një model hibrid, me disa fëmijë në shkollë dhe të tjerët nga shtëpia në një orar të përcaktuar, për të minimizuar në çdo kohë numrat e infektimit në vend. Disa prindër janë shprehur të shqetësuar për dërgimin e fëmijëve të tyre në shkollë para se të ekzistojë një trajtim ose vaksinë e pranuar gjerësisht për virusin. Por shumë të tjerë janë të etur për të mësuar dhe për të rifilluar, sepse prindërit duhet të jenë në punë dhe sepse arsimi në distancë ka qenë larg plotësimit të nevojave akademike dhe emocionale të fëmijëve.
Shkenca, ndërkohë, mbetet shumë larg nga të qenit e qartë.
“Ndërsa të dhënat janë kundërshtuese, fëmijët kanë një rol dhe mund të infektohen. Unë mendoj se hapja e shkollave dhe institucioneve të kujdesit ditor është shumë e rrezikshme,” tha Jeffrey Shaman, një epidemiolog në Universitetin Columbia.
Davies vuri në dukje se ai dhe kolegu i tij gjetën ndryshime të mëdha midis vendeve, në ndjeshmërinë e dukshme ndaj infeksionit në grupmoshat e ndryshme. Disa nga këto thjesht mund të jenë “zhurmë” në të dhëna, tha ai, dhe studiuesit kombinuan të dhënat nga vende të ndryshme për të marrë vlerësimet e tyre.
Sidoqoftë, është e mundur që mund të ketë dallime reale mes vendeve, duke përmendur se një studim i kohëve të fundit nga Mbretëria e Bashkuar nuk gjeti ndonjë ndryshim në shkallët e infeksionit mes fëmijëve dhe të rriturve, por thjesht thekson se më shumë hulumtime do të ndihmojnë për të hedhur më shumë dritë mbi këtë çështje, tha ai.
Burimi / https://gazetasi.al/
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
