Qershitë janë padyshim super-ushqimi i stinës së verës. Të buta dhe plot lëng mund të jenë të ëmbla ose të athta, por gjithnjë me një shije të mrekullueshme. Vetëm një tas prej tyre përmban rreth 90 kalori dhe janë të pasura me vitamina A dhe C.
Konsumimi i këtij fruti të vogël plot shije i dhuron trupit tuaj shumë antioksidantë që ndihmojnë në uljen e kolesterolit të keq dhe mbipeshës. Krahas këtyre vlerave ekspertët thonë se qershitë ndihmojnë organizmin edhe në shumë drejtime të tjera.
Në këtë artikull jepen disa nga vlerat e jashtëzakonshme që mund të përfitoni nga kokrrat e qershive.
- Ndikimi në kocka
Qershitë janë një burim i madh antioksidantësh dhe për këtë arsye ndihmojnë në rigjenerimin e kockave. Mjekët i lidhin me reduktimin e acidit nitrik që është faktori kryesor për sëmundjen e artritit rheumatoid dhe osteoartrit. Sipas një studimi të Universitetit të Bostonit në Amerikë, konsumimi i qershive redukton me 35% dhimbjen e kockave. Gjithashtu qershitë parandalojnë inflamacionin e organizmit dhe problemet me presionin e ulët apo të lartë të gjakut.
- Ulin nivelin e sheqerit në gjak
Për të gjithë personat me diabet, qershitë mund të jenë zgjidhja e duhur për të qëndruar të shëndetshëm. Si të gjithë frutat me ngjyrë të kuqe edhe qershitë ndihmojnë në rregullimin e sheqerit në gjak. Atoksianina, sipas mjekëve rrit me 50% prodhimin e nivelit të insulinës në trup duke ndihmuar kështu rregullimin e sheqerit në gjak.
- Ndihmon në sëmundjet e zemrës
Qershitë e athta ndihmojnë në përmirësimin dhe parandalimin e problemeve kardiovaskulare. Nëse i konsumoni vazhdimisht ato do të parandaloni edhe riskun e prekjes nga ataku në zemër. Ndihmojnë në reduktimin e yndyrnave të këqija në gjak duke ju dhuruar një trup të shëndetshëm.
- Kundër sëmundjeve kancerogjene
Një dietë sa më e pasur me qershi mund të ulë rrezikun e prekjes nga sëmundjet kancerogjene. Duke qenë të pasura me fibra ato promovojnë tretjen e mirë dhe ulin rrezikun e prekjes nga kanceri i zorrës së trashë. Veçanërisht qershitë e athta të cilat përmbajnë disa enzima që ndihmojnë trupin të rregullojë radikalet e lira.
- Ndihmon në përmirësimin e memories
Janë një burim i mirë antocianine që do të thotë një shëndet i mirë për memorien. Ky frut shumë i shijshëm ndihmon trurin të përmirësojë funksionet e tij dhe të përmirësojë memorien ndër vite.
- Ndikimi tek gjumi
Konsumimi i një tasi me qershi në darkë do të përmirësojë edhe cilësinë e gjumit. Sipas ekspertëve qershitë ndihmojnë në rregullimin e orës së brendshme të trupit dhe ciklit të gjumit tek njeriu. Kjo pasi janë të pasura me melatoninë, një enzimë që ndihmon në qetësimin e organizmit.
Këshillohet që të konsumoni gjithnjë qershi të freskëta apo lëngun e tyre të freskët, për të marrë vlerat më të mira.
Burimi / AgroWeb.org
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
