Angelina Jolie fluturoi për në Ukrainë. Aktorja dhe aktivistja u pa në një lokal në Lviv. Jolie është e dërguara speciale e UNHCR-së, Komisioneri i Lartë i Kombeve të Bashkuara për Refugjatët. Javët e fundit, ajo kishte shprehur solidaritetin e saj me popullin ukrainas në mediat sociale.
Videoja e Angelina Jolie në një lokal në Lviv
Në videon shumë të shkurtër, e cila u postua në Facebook nga Maya Pidhoretska dhe e cila më pas u përhap me shpejtësi në rrjet, Angelina Jolie shihet duke hyrë në një lokal me një pamje diskrete: çantë shpine në sup, tuta dhe flokë të lidhura mbrapa. Një mënyrë për të kaluar pa u vënë re. Një djalë, që është duke dëgjuar muzikë, as që e kupton ardhjen e saj. Ndërkohë aktorja, pasi kuptoi se po filmohej me celular, tha përshëndetje dhe më pas porositi diçka.
Solidariteti i Angelina Jolie me popullin ukrainas
Angelina Jolie është ndër fytyrat e njohura që janë ekspozuar publikisht kundër luftës që Rusia i ka shpallur Ukrainës. Disa javë më parë ajo shprehu mbështetjen e saj për popullin ukrainas. Në një postim të publikuar në Instagram ajo ka thënë:
“Si shumë prej jush, edhe unë po lutem për popullin ukrainas. Qëllimi im me kolegët nga Komisioneri i Lartë i Kombeve të Bashkuara për Refugjatët është që të bëhet gjithçka që është e mundur për të garantuar mbrojtjen dhe të drejtat e njeriut të të zhvendosurve dhe refugjatëve. Tashmë kemi parë raporte të viktimave dhe njerëzve që ikën nga shtëpitë e tyre për të gjetur një vend të sigurt”.
Së fundmi, në atë postim që daton më 24 shkurt, aktorja shpjegoi se nuk është e mundur të nënvlerësohet ajo që po ndodh në Ukrainë. Angelina Jolie, e cila ka qenë gjithmonë e përkushtuar për të ndihmuar të tjerët, nuk është kufizuar në mbështetje thjesht sociale, por ka vendosur të veprojë personalisht dhe të shkojë në Ukrainë.
Burimi / https://www.fanpage.it/
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
