Përpara pasqyrës ajo “lufton” për të pasur një imazh estetik korrekt, pse jo edhe tërheqës për të tjerët. Në fakt këtë e bën jo vetëm sepse i pëlqen të ketë një portret të tillë, porse kjo i shkon për shtat një terapie psikologjike të shëndetshme, për veten, bashkëshortin dhe fëmijët. Harmoninë e gjithë kësaj e vë re edhe në mbarëvajtjen dhe mirëfunksionimin në raport me bashkëpunëtorët e kolegët. Kush më mirë se ajo mund të jepte këshilla bukurie, për aq kohë sa është “koka” dhe drejtuesja e universitetit të vetëm në profilin e parukeri dhe estetikës për vendin tonë. Për Eglantina Kallpakçin, një imazh i kuruar, pavarësisht roleve të femrës në përditshmëri, është një element i ndjeshëm në çdo lloj marrëdhënieje. “Performancën dhe rrezatimin tim femëror përpiqem ta mbaj në nivelin më të lartë. Këtë gjë e kam bërë edhe në momentet e para të njohjes me bashkëshortin, edhe tani që kemi krijuar familjen tonë. Gjëja e parë që bëj në mëngjes, është një dush i ngrohtë, një make up i lehtë, krehje e flokëve dhe një veshje e kuruar; edhe pse në kushtet e shtëpisë, ajo nuk mund të mbetet jashtë vëmendjes sime. Nuk do e toleroja dot shpërfilljen, apo mungesën e kujdesit, duke e lëshuar veten, duke veshur kostume sportive, atlete, etj. Madje edhe në shtëpi përpiqem të jem një grua e rafinuar. Do t’u sugjeroja të gjitha femrave të cilat kanë familje, që t’i kushtonin rëndësi look-ut pavarësisht detyrimeve familjare, të cilat janë të shumta. Ky është një element që ne e theksojmë ndjeshëm në mësimdhënien me studentët tanë, duke e cilësuar si detaj shumë të rëndësishëm për një profesionist të ardhshëm. Familja është gjithçka, brenda saj duhet të jemi të përsosur”.
Psikologji Dhjetor 2010
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
