Vaji i kokosit është një nga ushqimet më të këqija që mund të konsumoni ose një helm i pastër…paralajmërimi vjen nga një profesore e universitetit prestigjioz të Harvardit, Karin Michels.
Vaji i kokosit, është bërë gjithnjë e më i përdorshëm vitet e fundit, pasi mbrojtësit e ushqimit të shëndetshëm pretendojnë se ai është më i shëndetshëm se format e tjera të yndyrës.
Disa persona madje, zgjedhin të hedhin edhe një lugë vaj kokosi në kafenë apo lëngun e tyre të frutave për shkak të përfitimeve të supozuara shëndetësore. Vaji i kokosit madje ka zëvendësuar edhe vajrat e tjera në gatim ndërkohë që njerëzit zgjedhin që t’ia ofrojnë atë edhe kafshëve të tyre shtëpiake.
Sidoqoftë, Michels, nuk është e vetmja që e kritikon atë. Edhe pse jo fuqishëm, institucione të tjera kanë paralajmëruar kundër konsumimit të tepërt të tij. Fondacioni britanik i zemrës thotë se nuk ka mjaftueshëm kërkime që të japin një përgjigje përfundimtare nëse vaji i kokosit është apo jo më i mirë për njeriun krahasuar me yndyrnat e tjera.
Ai thotë se zgjedhja më e mirë do të ishte ajo për yndyrnat më të pangopura si vaji vegjetal apo ai i lulediellit. Vaji i kokosit është një yndyrë 86 % e ngopur, një e treta më shumë se gjalpi.
Sasi të tepruara të yndyrnave të ngopura shkaktojnë rritje të kolesterolit që mund të çojë edhe në arterie të bllokuara dhe sëmundje zemre. Fondacioni thotë madje se duhet zëvendësuar gjalpi, dhjami, vaji i kokosit dhe i palmës me sasi të vogla yndyrnash si vaj ulliri, luledielli etj.
Burimi / TopChannel
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
