Shumë fëmijëve mund t’u ndodhë që kur zhvillojnë përdorimin e gjuhës fillojnë të flasin me vete ndërsa luajnë. Kjo situatë ndodh sidomos gjatë lojës simbolike ose kur të vegjlit inskenojnë veprime të jetës së përditshme ose kur luajnë me kukulla.
Asgjë për t’u shqetësuar, të paktën sipas gjykimit të shumë psikologëve, duket se është një fenomen krejtësisht normal, në të vërtetë, fëmija që flet me veten ndërsa luan është inteligjent. Le të zbulojmë më shumë.
Arsyeja pse fëmija që flet me veten kur luan është i zgjuar
Sa herë ju ka ndodhur nëse jeni nëna të fëmijëve nga 2 deri në 3 vjeç t’i dëgjoni ata duke folur me veten ndërsa luajnë dhe jo vetëm? Është një proces krejt normal i rritjes, një lloj monologu me të cilin fëmijët shoqërojnë aktivitetet e tyre. Psikologët e zhvillimit e klasifikojnë këtë fazë të fëmijëve si “monolog i përqendruar tek vetja”, ose “të menduarit me zë të lartë”.
Sipas një studimi të kryer nga psikiatri Luis Rojas Marcos, e folura me vete tek fëmijët, e ndihmon këtë të fundit që të përmirësojë gjuhën e tij dhe zhvillimin e tij njohës. Në fakt, duke folur me zë të lartë, të vegjlit do të ishin në gjendje të tërhiqnin vëmendjen e tyre, duke u përqendruar më mirë në atë që po bëjnë.
Kjo gjithashtu do t’i bënte ata më të vetëdijshëm për zgjedhjet që ata bëjnë, si dhe do t’i ndihmonte ata të zhvillonin imagjinatën dhe krijimtarinë e tyre. Për më tepër, biseda me veten e tyre do t’i stimulonte gjithashtu ata t’i shohin gjërat nga këndvështrime të ndryshme. Jo vetëm kaq, por është gjithashtu një ushtrim i vlefshëm për të stimuluar imagjinatën.
Në këtë drejtim, pikërisht rreth moshës 3 vjeç dhe rreth 8-10 vjeç fëmijët formojnë besimin se kanë një mik imagjinar për të folur. Një fenomen që më pas tenton të zhduket me rritjen dhe zhvillimin psikologjik.
Ky shtjellim, fryt i imagjinatës së fëmijës, e lejon atë të shprehë atë që nganjëherë nuk mund ta thotë direkt. Nëse prindërit vërejnë se prania e këtij “shoku” rrezikon marrëdhëniet me bashkëmoshatarët, atëherë është më mirë të konsultoheni me një psikolog fëmijësh, në mënyrë që të zhdukni çdo dyshim për ndonjë shqetësim emocional. Përndryshe, nuk ka asgjë për t’u shqetësuar.
Sidoqoftë, duke folur me zë të lartë, fëmija do të jetë në gjendje të zgjidhë më lehtë problemet dhe kjo do ta ndihmojë atë të korrigjohet nëse bën një gabim, si dhe të mësojë përmendësh fjalë të reja. Kjo është arsyeja pse, sipas ekspertëve, fëmijët që flasin me veten ndërsa luajnë konsiderohen më inteligjentë. Kështu që nëse e shihni ose dëgjoni fëmijën tuaj duke folur me veten e tij mos e qortoni duke menduar se është diçka e gabuar – përkundrazi inkurajojeni atë.
Për një kohë të gjatë mendohej gabimisht se kjo mënyrë e bërjes së gjërave mund të ishte një shenjë e ndonjë problemi emocional ose psikologjik, por në realitet të flasësh me veten gjatë lojës është një demonstrim i inteligjencës.
Në fund, të folurit me veten e ndihmon fëmijën të kanalizojë emocionet e tij dhe ne e dimë se si fëmijët rreth moshës 2-3 vjeç duhet të ndihmohen për t’i njohur dhe menaxhuar ato.
Burimi / https://www.chedonna.it/
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
