Rastet e hepatitit akut te fëmijët në mbarë botën janë rritur në 300. Kështu raportoi dje Organizata Botërore e Shëndetësisë, sipas raporteve të BBC. Subjektet e prekura nga sëmundja janë të ndarë në 20 vende, përfshirë Italinë, shumica e të cilave banojnë në Evropë dhe në numër të kufizuar edhe në Amerikë, Paqësorin Perëndimor dhe Azinë Juglindore, ndërkohë që autoritetet shëndetësore po punojnë për të zbuluar origjinën e rritjes misterioze të numrit të fëmijëve të prekur nga kjo sëmundje e mëlçisë, e identifikuar për herë të parë në Britaninë e Madhe një muaj më parë. Ndër hipotezat më të mundshme, mbetet ajo e Adenovirusit.
Rastet e para të këtij hepatiti të pazakontë janë identifikuar në Skoci tek fëmijët nën moshën 10 vjeç. Më shumë se 140 raste janë duke u hetuar aktualisht në MB. Disa prej tyre gjithashtu duhej t’i nënshtroheshin transplantit të mëlçisë pas infeksionit. Ata kishin simptoma fillestare të të vjellave dhe diarresë të ndjekura nga zverdhja e lëkurës ose e të bardhës së syve, të quajtur verdhëz. Megjithatë, viruset e hepatitit që normalisht shkaktojnë këtë gjendje (viruset A, B, C, D dhe E) nuk u zbuluan në asnjë nga fëmijët. OBSH ka theksuar se nuk është ende e qartë nëse ka pasur një rritje të rasteve të hepatitit apo një rritje të ndërgjegjësimit për gjendjen që normalisht do të kalonte pa u vënë re, ndoshta e lidhur me një rritje të testeve të kryera. Megjithatë, adenovirusi ishte patogjeni më i zakonshëm i gjetur në rreth tre të katërtat e fëmijëve në Mbretërinë e Bashkuar me hepatit të konfirmuar.
Dhe një lloj i veçantë i Adenovirusit, i quajtur F41, u gjet në një të katërtën e gjakut të atyre foshnjave. Zyrtarët shëndetësorë në Mbretërinë e Bashkuar besojnë se të vegjlit, të cilët nuk ishin të ekspozuar ndaj viruseve të zakonshme gjatë pandemisë Covid për shkak të reduktimit të jetës shoqërore, tani janë të infektuar. Ekspertët shëndetësorë po hetojnë gjithashtu shkaqe të tjera, si shfaqja e një lloji të ri Adenovirus, një infeksion i mëparshëm Covid ose që të dyja ndodhin njëkohësisht, siç kishte shpjeguar edhe virologu nga Universiteti i Milanos, Fabrizio.
Në favor të hipotezës së Adenovirusit u shpreh edhe Giorgio Palù, presidenti i AIFA-s, i cili në një intervistë për Corriere della Sera, shpjegoi se “nga 53 episode të ekzaminuara nga agjencia britanike, 40 ishin pozitivë për Adenovirusin dhe ky duket që të jetë shkaku kryesor. Por është një hipotezë për t’u konfirmuar, sepse nuk përjashtohet që të jetë “një lloj tjetër nga ata që njihen”. Një virus i ri atëherë? Sipas Palù “Nuk mund të përjashtohet plotësisht”, edhe nëse do të jetë nevojiten studime dhe hetime të mëtejshme për të konfirmuar këtë hipotezë.
Burimi / https://www.fanpage.it/
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
