Temperaturat e ftohta kanë tendencë të na mbajnë brenda dhe të na bëjnë më të prekshëm ndaj viruseve dhe infeksioneve, por përveç këtyre, moti i ftohtë mund të ndikojë tek trupat tanë në disa mënyra befasuese.
Ja se si mund të reagojnë trupat ndaj rënies sezonale të temperaturës.
- Gjuha punon më shumë se zakonisht.
Temperaturat e ftohta i thajnë buzët dhe shpesh tundoheni t’i lëpini ato për t’i lagur. Megjithëse mund t’ju japë lehtësim të përkohshëm, ky zakon mund të bëjë që buzët tuaja të copëtohen. Pështyma avullohet shumë shpejt, duke i lënë buzët tuaja më të thata se më parë. Përmban gjithashtu shumë enzima që janë shumë të ashpra për buzët delikate, duke ju shkaktuar siklet.
- Dhëmbët mund t’ju dhembin.
Nëse keni dhëmbë të ndjeshëm, mund të përjetoni dhimbje të mprehtë dhe shpuese kur jashtë është shumë ftohtë. Ajri i ftohtë mund të arrijë nervat thellë brenda dhëmbit dhe lëndon dhëmbët. Stomatologët rekomandojnë të merrni frymë përmes hundës kur jeni jashtë, dhe të mbështillni një shall rreth gojës për ta mbajtur atë të ngrohtë dhe për të mbrojtur dhëmbët e ndjeshëm nga i ftohti i dimrit.
- Sheqeri në gjak mund të rritet.
Moti i ftohtë inkurajon trupin të lëshojë hormone të stresit që rrisin nivelet e sheqerit në gjak. Kur temperaturat ulen, sheqeri në gjak rritet, sepse kur është ftohtë, ne jemi më pak të motivuar për të dalë jashtë dhe për t’u stërvitur. Meqenëse aktiviteti fizik ul sheqerin në gjak, mjekët rekomandojnë të punoni në shtëpi gjatë dimrit për të mbajtur nën kontroll nivelin e sheqerit.
- Mund të humbni peshë.
Ndërsa është e vërtetë që shumë njerëz shtojnë peshë në dimër, është gjithashtu më e lehtë për trupin të djegë kalori kur është ftohtë. Kur trupat përshtaten me temperaturat e ftohta, ne prodhojmë nxehtësi dhe djegim energji shtesë. Kur dridhemi për t’iu përshtatur të ftohtit, ne po djegim më shumë kalori për të gjeneruar nxehtësi.
- Mund t’ju shkaktohen më shumë rrudha.
Ne nuk mund ta fajësojmë plotësisht dimrin për rrudhat e tepërta, por lëkura është më e ndjeshme ndaj dëmtimeve gjatë sezonit të ftohtë. Për shkak se ka një rënie të lagështisë në ajër gjatë muajve të ftohtë, lëkura fillon të thahet. Nuk mund të mbajë mjaftueshëm ujë, dhe si rezultat, shkakton më shumë rrudha.
- Shikimi mund të përkeqësohet.
Sytë mund të jenë më të rrezikuar në dimër sesa në verë. Shpesh harrojmë të mbajmë syze dielli që bllokojnë rrezet ultravjollcë në sezonin e ftohtë, por dielli që reflekton nga bora mund të dëmtojë seriozisht sytë tanë. Shtresa e hollë që mbulon sytë tanë është shumë e ndjeshme ndaj ajrit të thatë dhe erës që mund ta bëjë atë të thahet dhe të shkaktojë dhimbje. Mjekët rekomandojnë përdorimin e lotëve artificialë në dimër kur jeni jashtë.
- Mund të dehidratoheni më lehtë.
Gjatë muajve të dimrit, rrallë ndihemi të etur dhe shpesh harrojmë të pimë ujë mjaftueshëm. Për shkak se djersisim më pak në mot të ftohtë, kemi tendencë të pimë më pak, duke menduar se jemi mjaftueshëm të hidratuar.
Por të ndiheni më pak të etur nuk do të thotë që trupi ka nevojë për më pak ujë dhe është e rëndësishme të pini sasinë e duhur që i nevojitet trupit çdo ditë.
Burimi / Panorama Online
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
