Kaosi emocional është një gjendje në të cilën ndiheni të vetmuar dhe të hutuar emocionalisht. Shumicën e rasteve mund ta lidhni me mërzinë sidomos në rastet kur nuk dini çfarë të bëni kur shfaqen probleme. Por kaosi emocional nuk ndalet këtu: mund të jetë gjithashtu një gjendje në të cilën nuk jeni në gjendje të përballoni edhe emocionet tuaja pozitive.
Karakteristikat
Kaosi emocional zakonisht përfshin:
Trazirat- Humbni kontrollin mbi emocionet tuaja, filloni të ndjeni gjëra që nuk mendonit se mund t’i ndjenit dhe si rezultat silleni në mënyrë impulsive.
Konfuzioni- Duke qenë se ju mungon qartësia, nuk dini çfarë vendimesh të merrni, ndaj i shtyni ato.
Frika- Keni frikë të bëni gabime sepse ndiheni të pasigurt.
Keqardhje-Mund të ndiheni në faj dhe të shqetësuar.
Projeksioni-Fajësimi i të tjerëve ose i vetë emocioneve për gjërat e këqija që ndodhin. Ju i shihni ato si të jashtme, kur në realitet, gjithçka është pjesë e juaja.
Ballafaqimi me kaosin emocional në një mënyrë pozitive
Së pari, duhet të dini se në mes të kaosit, është shumë e vështirë të marrësh një vendim dhe të rregullosh atë që është dëmtuar. Sidoqoftë, është e mundur ta trajtoni atë në një mënyrë pozitive, për shembull:
Nëpërmjet njohjes së vetvetes- Lidhja me veten tuaj të brendshme është mënyra më e mirë për të ditur se çfarë ndjeni, pse po keni një reagim të caktuar ndaj një situate dhe të dini se cilën rrugë të zgjidhni.
Jepini vetes kohë – Ndonjëherë mund të dëshironi të shpëtoni prej tij aq keq saqë gjithçka që bëni është ta lini mënjanë për më vonë, kështu që përfundoni duke grumbulluar ndjenja që e bëjnë çështjen më të madhe. Është më mirë nëse thjesht pranoni se mund t’i ndodhë kujtdo dhe merrni një moment për t’i lënë të gjitha të kalojnë.
Mos e zgjatni kaosin emocional- Edhe pse është e rëndësishme t’i lini emocionet tuaja të rrjedhin, është gjithashtu e rëndësishme që të mos e bëni atë përgjithmonë. Mos i lini të qëndrojnë në sistemin tuaj. Vazhdoni të ecni përpara dhe vendosni kufij për kaosin tuaj emocional.
Mbani në mend se ky është një progres gradual. Ju nuk mund të prisni që të merrni kontrollin mbi mendimet tuaja brenda natës dhe se nuk do të keni kurrë një kaos tjetër emocional në jetën tuaj.
Pra, çlirohuni nga ai vend i errët dërrmues ku ka trazira, frikë, konfuzion, faj dhe ankth. Besoni se është e mundur të ndaloni t’i shihni emocionet tuaja si diçka të jashtme. Vallëzoni me hijet, njihni ato, ftoni të dilni në kohën e duhur, mësoni prej tyre dhe kthejini ato në mirëqenie.
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
