A mund ta stërvitni veten për lumturi? Shkenca është e bindur për këtë, edhe nëse e njeh vështirësinë e dhënies së një përkufizimi të saktë dhe mbi të gjitha, pranon se është një gjendje e varur kryesisht nga elementë përtej kontrollit tonë. Sidoqoftë, 40% e saj është në duart tona dhe është rezultat i veprimeve tona: prandaj mund të bëjmë të paktën diçka për të qenë të lumtur, pavarësisht nga kushtëzimi i jashtëm.
Universiteti i Trentos, në bashkëpunim me Universitetin La Sapienza të Romës, kanë krijuar një program, të titulluar “Arti i lumturisë”: në këtë rrugë “trajnimi” u testua një grup njerëzish për nëntë muaj me një plan pune të bazuar mbi trajnimin mendor dhe kulturor me një qasje multikulturore. Gjatë kursit u trajtuan temat e psikologjisë, neuroshkencës, historisë së mendimit dhe filozofisë së jetës së Budizmit, me një hapësirë të madhe të rezervuar për praktikën e meditimit, përpilimin e një ditari dhe dialogun Zen. Ideja fillestare është se lumturia është kryesisht rezultat i një ekuilibri të brendshëm, një qëndrimi të mirë ndaj jetës dhe një perspektive më të hapur ndaj vetes dhe botës.
Për të arritur këtë ekuilibër kompleks, pjesëmarrësit iu përkushtuan praktikave të meditimit dhe përsiatjes të frymëzuara nga filozofia budiste, por gjithashtu thelluan studimin teknik të funksionimit të trurit dhe mendjes, në tema të tilla si efektet e trajnimit mendor, neuroplasticiteti, mendja-truri -veprimet trupore, ndjenja e vetes, ndjeshmëria dhe dhembshuria dhe tema të tjera nga neuroshkenca, psikologjia dhe filozofia. Gjatë kursit, pjesëmarrësit iu nënshtruan testeve të cilat zbuluan një përmirësim progresiv të gjendjes së mirëqenies psikologjike, në kuptimin e vetvetes dhe një rënie të ankthit, stresit dhe mendimeve negative.
Studimi, rezultatet e të cilit u botuan në revistën shkencore “Kufijtë në Psikologji”, megjithëse me disa kufizime metodologjike të lidhura për shembull me mungesën e një grupi kontrolli, sugjeron që një program intensiv që ndërthur ushtrime soditëse me një kornizë të fortë teorike në studimet psikologjike dhe neuroshkencore, është një mjet i dobishëm për të promovuar mirëqenien mendore tek individët dhe mund të konsiderohet një “trajnim” në artin e lumturisë.
Meqenëse mundësia e hyrjes në një program të tillë nuk është saktësisht brenda mundësive të të gjithëve, ka disa sjellje me të cilat ne mund të stërvitemi për lumturi edhe në jetën e përditshme. Për të qenë të lumtur, në fakt, nuk mjafton të mendojmë pozitivisht: është më tepër e nevojshme të jemi të qetë me veten dhe mbi të gjitha të dimë se si të pajtohemi me aspektet negative që mund të lindin. Për t’u stërvitur për lumturi, ne mund të përfitojmë nga të gjitha mundësitë brenda veprimeve tona për të pushtuar lumturinë ose të paktën t’i afrohemi sa më shumë që të jetë e mundur duke i vënë këto këshilla në praktikë.
– Kultivoni marrëdhënie të forta dhe kaloni kohë me miqtë: Studimet tregojnë se ata me një rrjet të fortë emocional të familjes dhe miqve janë më të lumtur dhe më të shëndetshëm.
– T’i japësh më shumë vlerë kohës sesa parave, edhe nëse paratë kanë rëndësinë e tyre: të qenit në gjendje të marrim atë që na nevojitet është thelbësore për qetësinë tonë të brendshme.
– Vlerësoni gjërat e vogla.
– Jetoni në të tashmen.
– Përqendrohuni në aspektet pozitive sesa në vështirësitë.
– Shikojini sfidat si mundësi për tu rritur.
– Mbani një qasje të mirë ndaj jetës dhe njerëzve.
– Bëni përvoja të reja dhe jini kuriozë për realitetin.
– Praktikoni meditimin.
– Ushtrohuni.
– Shikojini të tjerët me dhembshuri, jo me neveri.
– Pranoni rrethanat në vend që t’i luftoni ato.
Burimi / https://www.tgcom24.mediaset.it/
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
