Të ndihesh i mbingarkuar, i pavlerësuar ose i dyzuar nga pasiguria nuk është më një çështje e rrallë, por një përvojë e shumë prej nesh çdo ditë. Lajmet që vijnë pa pushim, pritshmëritë e larta në punë dhe presioni për të treguar një version perfekt në rrjetet sociale mund të dobësojnë vetëbesimin dhe optimizmin.
Psikologjia pozitive ofron mënyra të bazuara shkencërisht për të rivendosur ekuilibrin emocional dhe për të gjetur forcën brenda vetes, duke kthyer momentet e zakonshme të jetës në mundësi për rritje dhe mirëqenie.
Ndryshe nga qasjet tradicionale të psikologjisë që fokusohen kryesisht tek trajtimi i sëmundjeve mendore, psikologjia pozitive, sipas Martin Seligman, synon të forcojë aspektet që bëjnë jetën të vlefshme. Kjo përfshin gëzimin, shpresën, motivimin dhe marrëdhëniet e shëndetshme. Sipas psikologut të njohur, njerëzit që praktikojnë rregullisht psikologjinë pozitive raportojnë më shumë lumturi dhe rezistencë ndaj stresit, duke i bërë sfidat më të përballueshme. Por si ndikon psikologjia pozitive në jetën e përditshme?
Rrit optimizmin: Të mësuarit të fokusohesh tek aspektet pozitive të situatave ndihmon të perceptosh sfidat si mundësi për të mësuar dhe për të rritur qëndrueshmërinë emocionale.
Forcon vetëbesimin: Duke njohur dhe vlerësuar arritjet personale, madje edhe të vogla, individi ndjen më shumë besim në aftësitë e veta.
Përmirëson marrëdhëniet: Një qëndrim optimist dhe i vetëbesueshëm kontribuon në marrëdhënie më të shëndetshme, sepse rrit empatinë dhe komunikimin efektiv.
Ushtrime praktike për optimizëm dhe vetëbesim
1.Shkrimi i mirënjohjes: Çdo ditë shkruani 3 gjëra për të cilat jeni mirënjohës. Studime nga Robert Emmons tregojnë se kjo praktikë rrit ndjeshëm lumturinë dhe ul stresin.
2.Ushtrimi “Arritjet e ditës”: Në fund të ditës, listoni të paktën 2 gjëra që keni arritur, pa marrë parasysh madhësinë. Kjo forcon vetëvlerësimin dhe perceptimin pozitiv të vetes.
3.Shkëmbyer komplimente: Bëni një zakon ku të shprehni komplimente të sinqerta ndaj të tjerëve dhe të pranoni komplimentet që merrni. Ky akt përmirëson humorin dhe ndikon tek ndjenja e vetëvlerësimit.
4.Ushtrimi i optimizmit të ardhshëm: Imagjinoni skenarë të ndryshëm të ardhshëm ku gjithçka shkon mirë. Ky ushtrim ndihmon trurin të krijojë një qasje më pozitive ndaj sfidave reale.
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
