Prindërit sot po përpiqen me mjetet që kanë në dispozicion të zgjidhin të gjitha problemet e vogla apo të mëdha të fëmijëve të tyre, jo vetëm në fëmijëri, por edhe si të rritur. Prindërimi ka evoluar në një mënyrë pozitive, duke përfshirë ndryshime në mënyrën e marrëdhënieve me të vegjlit dhe në këtë fazë të rritjes mund të lindin sjellje jo korrekte nga ana e prindërve, gjë që mund të ndikojë ndjeshëm tek ata si të rritur. Prandaj, rekomandimi i ekspertëve është që të braktiset qëndrimi tepër mbrojtës ndaj fëmijëve, sepse rrezikon të ndikojë negativisht në zhvillimin e tyre.
Në brezat e kaluar, prindërit e kishin më të vështirë t’u jepnin pasardhësve të tyre gjithë kujdesin që tani u rezervohet brezave të rinj. Për shembull, në kohën e gjyshërve tanë, ndëshkimi, agresioni fizik apo verbal ishin mënyra më e përshtatshme për të edukuar fëmijët. Specialistët kanë shprehur shqetësimin e tyre ndaj gjeneratave të reja, sepse po përjetojnë “mbikompensim” dhe mbrojtje të tepruar: sjellje të arritura në ekstreme që mund të ndikojnë në zhvillimin social, personal dhe konjitiv të fëmijëve.
Prindër që zgjidhin gjithmonë problemet e fëmijëve të tyre
Praktikisht, prindërit e sotëm përpiqen me të gjitha mjetet dhe në çdo rrethanë të zgjidhin grindjet që mund t’i mundojnë fëmijët e tyre, por në këtë mënyrë përfundojnë duke i dëmtuar pa e kuptuar. Është fakt që baballarët dhe nënat përpiqen gjithmonë të sigurojnë mirëqenien e fëmijëve të tyre, por është thelbësore t’u jepet atyre një pavarësi më e madhe. Fëmijët duhet të ndihen të fuqizuar për të bërë gabimet e tyre në mënyrë që të mësojnë prej tyre dhe të kuptojnë më mirë se si të ndërveprojnë me botën përreth tyre.
Prindërit hiper-mbrojtës janë të dëmshëm për fëmijët e tyre
Prindërit që zgjidhin gjithçka për fëmijët e tyre priren të besojnë se në këtë mënyrë kujdesen për ta, përkundrazi kjo vëmendje e tepruar mund të shkaktojë probleme që lidhen me vetëvlerësimin dhe mënyrat se si ata lidhen me botën. “Një i mitur të cilit i bëjmë gjithçka, do të rritet duke menduar se nuk është në gjendje të bëjë asgjë” – shpjegoi për El País, Rosa Rasche, edukatore e disiplinës pozitive dhe prindërimit me respekt.
Shumë baballarë dhe nëna besojnë se është më mirë t’i parandalojnë fëmijët e tyre të përjetojnë situata negative që mund t’i ekspozojnë ata ndaj efekteve kundërproduktive. Ekspertët besojnë se prindërimi modern, i karakterizuar nga ndërhyrje të ekzagjeruara, ndodh për shkak të parakohësisë me të cilën fëmijët e gjejnë veten duke jetuar: një nxitim që shkakton frikë të madhe, duke i bërë ata të besojnë se fëmijët do të pësojnë dëme.
Sipas studimeve psikologjike, për t’i dhënë një siguri më të madhe fëmijëve, është thelbësore të braktisni një qëndrim tepër mbrojtës, përgjegjës për pasiguritë që përjetohen jashtë njësisë familjare. Është thelbësore, sipas psikologëve, të mos ua kaloni frikën fëmijëve tuaj dhe t’i lini ata të bëjnë gabime. Më pak ndërhyrje dhe autonomi më e madhe, do t’i lejojë fëmijët të ndihen më të sigurt, por edhe më të fuqizuar, për të kërkuar ndihmë ose për ta trajtuar atë vetë duke shfrytëzuar burimet e tyre.
Përgatiti Orjona Tresa / Burimi giornodopogiorno.org
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
