Rishfaqja e çdo lloj marrëdhënieje, qoftë ajo romantike, platonike apo familjare, është mjaft emocionuese për ne. Megjithatë, “stili ynë i lidhjes”, mënyra specifike se si ne lidhemi me të tjerët, luan gjithashtu një rol të madh në atë se sa e vështirë e kemi të largohemi nga këto marrëdhënie.
Ekzistojnë katër stile kryesore të lidhjes së të rriturve: i sigurt, i shqetësuar, shmangës dhe i frikësuar. Sipas psikologes klinike Lisa Firestone, ata me një model lidhjeje në ankth priren të lidhin identitetin e tyre dhe ndjenjën e vlerës me partnerin e tyre. “Nëse keni vënë re se jeni ndjerë vërtet në ankth në të gjitha marrëdhëniet tuaja, duke qenë të preokupuar për tradhtinë e partnerit tuaj ose shpesh duke pyetur veten nëse partneri juaj ju pëlqen akoma, mund të mendoni se keni një stil lidhjeje që ju bën dëm,” psikoterapistja psikoseksuale dhe marrëdhëniesh Silva Neves tha për Stylist.
Ndërsa shumë prej nesh mund ta kenë gjetur veten duke u rikthyer tek i njëjti partner, studime të shumta kanë arritur në përfundimin se “individët me ndjeshmëri të lartë ndaj refuzimit dhe stilin e lidhjes ankthioze përjetuan efektet më negative ndaj ndarjes dhe refuzimit romantik”. Pra, jo vetëm që këta tipa personaliteti i bëjnë më të vështira ndarjet e menjëhershme, por e kanë gjithnjë e më të vështirë të shkëputen dhe të vazhdojnë përpara. “Një person që formon një lidhje të preokupuar në ankth ka më shumë gjasa të ndihet i pasigurt dhe të ketë frikë nga të qenit i vetëm, i braktisur ose i refuzuar”, shkruan Firestone në Psychology Today. “Njerëzit me një model lidhjeje të tillë, mund të jenë të prirur të mbështesin një fantazi për partnerin ose marrëdhënien e tyre,” shpjegon ajo.
Ndonëse nuk është e pazakontë të supozohet se të jesh me dikë është më mirë sesa të jesh vetëm, Firestone shpjegon se ata me një stil lidhjeje në ankth mund të kuptojnë intelektualisht se marrëdhënia e tyre po i lëndon, por ndihen të paaftë për të kthyer shpinën. “Ndarjet nuk janë të lehta për askënd, por për njerëzit që kanë përjetuar një model lidhjeje të tillë, të kuptuarit e këtij modeli mund të jetë një hap vendimtar drejt rikuperimit nga dhimbja, në vend të qëndrimit të mbërthyer në dhimbjen e tyre,” përfundon ajo.
Përgatiti K.I / Buirmi stylist.co.uk
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
