FB

January 20, 2022 | 8:05

Si të kapërceni humorin jo të mirë në dimër?

 

Ndërsa ditët bëhen më të ftohta dhe shkurtohen, shumë prej nesh ndjejnë rënie të gjendjes shpirtërore, por nuk ka pse të jetë kështu.

Lëvizni pareshtur

Rënia e humorit në dimër është fort e lidhur me nivelet në rënie të hormonit humor-nxitës, serotonin, gjë që ndodh në këtë kohë të vitit. Kjo ndodh sepse enzimat që thithin serotoninën bëhen më aktive ndërsa ditët bëhen më të shkurtra. Kërkuesit në Universitetin Princeton në SHBA kanë zbuluar se lëvizjet ritmike, si për shembull shkundja e këmbëve, kërcitja e gishtave ose përtypja e një çamçakëzi rrisin çlirimin e soerotoninës. Dr. Caroline Longmore, autore e librit “Sekreti i Serotoninës”, thotë se gjithashtu ju mund ta rrisni nivelin e saj nëpërmjet dietës. Ajo na sugjeron të shtojmë një ushqim serotoninë-nxitës në çdo vakt, si: gjeldeti, shpargujt, farat e lulediellit, djathi i njomë, ananasi, spinaqi, bananet, etj.

Mbërtheni rehatinë

Nëse e kaloni gjithë dimrin duke u qarë për të ftohtin, lagështirën dhe errësirën, është e garantuar se do të jeni me humor të rënë. “Përqendrohuni te gëzimet dimërore”, shprehet trajneri motivues Robert Ashton, autor i librit “Plani i jetës: 700 mënyra të thjeshta për të përmirësuar jetën tuaj”. Ai këshillon të bëni një listë gjërash që mund të bëhen vetëm tani, si për shembull të shkoni për ski ose të shihni borën që bie, ose gjëra që bëhen më mirë në dimër, si të kaloni natën mbledhur kutullaç me një libër ose të pini çokollatë të ngrohtë dhe të synoni që të bëni një nga këto gjëra çdo ditë.

“Dëgjojeni” trupin tuaj

A keni ftohtë më shumë se normalisht e kërkoni pije të ngrohta dhe pulovra leshi? Atëherë ndoshta dëshironi të telefononi një miku ose të ftoni një grup shokësh. Sipas kërkuesve në Universitetin e Torontos në Kanada, kemi më tepër ftohtë ose kërkojmë gjëra më të ngrohta kur ndjehemi shoqërisht të izoluar ose kur kemi një gjendje shpirtërore të rënë.

Mbani shtëpinë të pastër

Kushtet dimërore janë shkaktare kryesore të mykut – gjë që Dr. Edmond Shenassa i Shkollës Braun të Mjekësisë në Sh.B.A e lidh me gjendjen e rënë shpirtërore. “Toksinat që gjenden në myk kanë treguar se ngadalësojnë atë pjesë të trurit që ka të bëjë me emocionet që ne i përjetojmë si depresion”, thotë ai. Nëse shtëpia juaj ka myk, pastrimi i pjesëve të prekura me një solucion zbardhues dhe ujë do t’ju ndihmojë.

Shtoni magnezin

Çrregullimi Sezonal Emotiv është i lidhur me nivelet e ulëta të melatoninës. Sipas nutricion-istes Kate Cook: “Nëse nuk flini mirë, natyrisht ju do të prodhoni nivele më të ulëta melato-nine. Magnezi ndihmon të nxisë gjumin e thellë, prandaj rrisni nivelet e tij në dietën tuaj me ushqime, si: frutat e thata, farërat dhe perimet me gjethe jeshile, ose provoni të përdorni vaj magnezi në lëkurën tuaj.”

 

Përgatiti: Manjola EREQI   |   Burimi: PsychoNews

© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.

MARKETINGU:
Agjente Marketingu:
Erinda Topi: 0688019400
E-mail: [email protected]

© Revista Psikologjia. Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.

To Top