Një nga patologjitë që haset shumë shpesh janë tumoret e fshikëzës urinare, simptoma kryesore e së cilës është urinimi me gjak me ngjyrë të errët.
Kirurgu urolog, Dr.Gjergji Karamitri është bërë pjesë e emisionit shëndetësor ‘Diagnozë’ ku ka folur për shkakun e shfaqjes së këtyre tumoreve, simptomave dhe ndërhyrjeve kirurgjikale.
Ai shpjegoi se në rastet e një hematurie (urinimi me gjak), duhet të trajtohet me kujdes për të kuptuar nëse lidhet me një tumor. Kjo është një sëmundje që prek më së shumti moshat e mesme dhe të thyera, ndërsa të rinjtë janë raste të rralla.
Si patologji është rreth 3 herë më e shpeshtë tek burrat sesa tek gratë. Kirurgu rrëfeu se në Shqipëri ka një rritje të rasteve të tumoreve të fshikëzës së urinës këto 15 vitet e fundit.
Një ndër shkaqet kryesore të shfaqjes së kësaj sëmundje është konsumimi i duhanit, prandaj meshkujt janë më të prekur.
Mënyra e diagnostikimit ka disa faza duke nisur nga ekzaminimet laboratorike dhe eko-t. Ekzaminimi më i mirë është cistoskopia, ku mjekët shohin me imtësi nëse ka apo jo një tumor.
Burimi / http://www.oranews.tv
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
