Ndërsa plakemi, të gjithë do të donim të dinim disa sekrete për të mbajtur trurin tonë në formë dhe për të ruajtur kujtesën tonë. Së fundmi një studim i ri ka identifikuar se cila është forma më e mirë e stërvitjes për të na ndihmuar me këtë.
Ndihma për të ruajtur kujtesën dhe kujtimet tona është një nga objektivat kryesore të shumë aktiviteteve që ne kryejmë kur jemi të rinj me synimin e pleqërisë. Për të zbuluar se si funksionon mekanizmi i mbrojtjes së kujtesës dhe për të na ndihmuar të ruajmë kujtimet tona për aq kohë sa të jetë e mundur, një ekip studiuesish analizuan 180 të moshuar të konsideruar të shëndetshëm por joaktivë dhe i ndanë në 3 grupe: grupi i parë i fokusuar në aktivitetin fizik të ecjes, grupi i dytë iu kushtua vallëzimit, ndërsa i treti kreu ushtrime shtrirëse dhe ekuilibri.
Të tre grupet u ndoqën nga studiuesit për një periudhë prej gjashtë muajsh dhe të gjithë pjesëmarrësit e studimit u takuan tre herë në javë për të kryer aktivitetin fizik të caktuar për ta; përveç kësaj, grupi i vallëzimit ka rritur në mënyrë progresive vështirësinë e koreografive dhe ushtrimeve gjatë kohëzgjatjes së eksperimentit. Para dhe pas gjashtë muajve të eksperimentit, të gjithë pjesëmarrësit u vëzhguan nga rezonanca magnetike, si dhe me teste kognitive dhe kardiorespiratore, për të parë se cilat kanë qenë efektet e formave të ndryshme të aktivitetit fizik në trurin e tyre.
Doli se ushtrimet aerobike janë ato që kanë sjellë përfitimet më të mëdha për trurin tonë. Në fakt, zonat e trurit që vuajnë më shumë nga barra e moshës së përparuar duket se përfitojnë më shumë se të tjerat nga ushtrimet aerobike, të tilla si vallëzimi ose ecja. Sa i përket grupeve që iu përkushtuan shëtitjeve dhe koreografive të vallëzimit, studiuesit vunë re një rritje të lëndës së bardhë në tru, veçanërisht në ato zona që luajnë një rol në formimin e kujtimeve. Tek grupi që bëri shëtitje u përmirësua kujtesa pas studimit dhe të gjithë pjesëmarrësit në grup demonstruan aftësi më të mirë për të kujtuar kujtimet e vjetra. Në të kundërt, tek njerëzit që bënin ushtrime shtrirëse dhe ekuilibri, studiuesit nuk panë asnjë përmirësim në tru – përkundrazi ata panë rënien fiziologjike të lëndës së bardhë.
Me pak fjalë, pas vetëm gjashtë muajsh aktivitet fizik të bërë tri herë në javë, pjesëmarrësit e studimit kanë treguar përmirësime të jashtëzakonshme në shëndetin e trurit dhe aftësitë e tyre të kujtesës. Asnjëherë nuk është vonë për të përmirësuar shëndetin e trurit tonë dhe sigurisht që aktiviteti fizik është një mënyrë e shkëlqyeshme për ta bërë atë.
Burimi / https://www.greenme.it/
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
