Ky është Arjan Mullahi, mjeku nga Kruja i cili në Gjermani cilësohet si “Zot i veshur me të bardha”. “Kishim dëgjuar për transplante organesh por për transplante kockash, jo”. Kështu shkruanin dy vjet më parë mediat gjermane për mjekun shqiptar kur kreu transplantin e kockave në spitalin e Shën Jozefit. Së fundmi, në korrik të këtij viti ka kryer transplant kockash te një grua nga Kuçova.
“Arjan Mullahi është Zot i veshur me të bardha”, shkruajnë pas këtij suksesi gazetat gjermane. Specialisti i Kirurgjisë speciale të traumave, doktor Mullahi, guxoi në këtë operacion të vështirë për të cilin edhe ai si kirurg është i vetëdijshëm që ka një risk të paimagjinueshëm dhe kërkon guxim. Ndërhyrja parashikon një metodë të veçantë e cila mbështetet në eshtrat e një personi të vdekur.
Pacientja nga Kuçova, Resmije Senka para 18 vitesh ka kryer vendosjen e protezave në këmbët e saj. Pas tri vitesh nga operacioni, proteza e djathtë duhej riparuar. Në 7 vitet e fundit, Resmija kishte dhimbje të papërshkrueshme. Në dhjetor të 2017-ës ajo theu dhe femurin por për fat të mirë takoi doktor Mullahin i cili mori përsipër operacionin.
Të jetosh me kockat e të vdekurit, është një teknikë e rrallë, kirurgjikale që mundëson rikonstruksion të defekteve të kockore me transplantin e kockave të të vdekurit. Tanimë, dy javë pas këtij operacioni pacientja ec vetë dhe pa dhimbje. Kjo ndërhyrje ishte e paimagjinuar për gjermanët të cilët nga momenti që doktor Mullahi u shkoi në Gjermani për specializim, nuk e lanë më të ikte.
Tashmë doktori nga Kruja punon si shef i Shërbimit të Kirurgjisë në Spitalin e Shën Jozefit, në një qytet në Perëndim të Gjermanisë.
Burimi / http://www.newsbomb.al/
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
