Në një botë që shpesh mat vlerën e individëve vetëm përmes pasurisë dhe suksesit material, mund të mendojmë se humanizmi është një luks i papranueshëm, që kërkon kohë, energji dhe burime që shpesh janë të kufizuara. Por a është vërtetë kështu? A është humanizmi një barrë që na varfëron, apo një pasuri që na pasuron në mënyra që shkojnë përtej paraja?
Figura të njohura si Mahatma Gandhi, Martin Luther King Jr. dhe Nënë Tereza janë shembuj të njerëzve që, përmes angazhimit të tyre humanist, kanë bërë një ndikim të pashlyeshëm në botë. Ata nuk u varfëruan nga dëshira për të shërbyer, por përkundrazi, e pasuruan botën me vlera që janë të paçmueshme. Veprat e tyre vazhdojnë të frymëzojnë dhe të formësojnë shoqëri më të drejta dhe më të barabarta.
Humanizmi është një forcë që i jep vlerë çdo individi, pa dallim feje, race apo statusi social. Ai na ndihmon të krijojmë lidhje më të thella mes nesh dhe të nxisim ndihmën dhe mbështetjen reciproke. Në thelb, humanizmi kontribuon në ndërtimin e një shoqërie më të shëndetshme, ku çdo individ ka mundësinë të arrijë potencialin e tij të plotë. Në këtë frymë, Fabiola Elezaj, psiko-sociologe dhe drejtuese e Qendrës PTC (Përkujdesje Psiko-Sociale dhe Kreativitetit), ka nisur një nismë që do të bëjë shumë fëmijë të lumtur.
Këta fëmijë, të cilët ndodhen në një situatë të veçantë, do të kenë mundësinë të shfaqin aftësitë e tyre krijuese në një ekspozitë të veçantë, si pjesë e një ankandi bamirësie për festat e fundvitit. Punimet e këtyre fëmijëve – vizatime me laps, piktura me bojëra vaji apo uji, dhe instalacione me materiale të riciklueshme – janë krijuar me shumë dashuri dhe përkushtim. Secila copëz arti ka vlerën e vet, dhe të ardhurat nga ky ankand do të shkojnë për të mbështetur fëmijët që nuk kanë mundësi të ndjekin terapitë dhe shërbimet speciale që kanë nevojë.
Dhurimi në këtë rast është më shumë se një akt bamirësie, është një mundësi për t’i ofruar mbështetje atyre që kanë nevojë për të, dhe për të krijuar një rreth solidariteti dhe dashurie që na pasuron të gjithëve. Duke kontribuar, jo vetëm që ndihmojmë këta fëmijë, por edhe pasurojmë shpirtin tonë me ndjenja të vërteta dhe të thella.
Le të bëhemi bashkë në këtë ankand bamirësie dhe të bëhemi pjesë e një iniciative që do të sjellë më shumë dritë dhe shpresë për fëmijët që kanë nevojë për ne.
#RevistaPsikologjia
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
