Nga: Fleura Shkëmbi
Vera me ditët e gjata dhe me diellin që merr kohën e vet për t’u larguar erdhi më në fund edhe për këtë vit. Gjatë netëve të ngrohta gjatë të cilave nuk të zë gjumi dhe dëshiron të qëndrosh jashtë, një nga gjërat më të mira dhe më të bukura që mund të bësh është të flirtosh. Dalim nga një dimër i gjatë, i lodhshëm për të lëshuar potencialin seksual dhe për t’u ndier më të përmbushur brenda vetes. Sapo fillon pranvera përgatitemi të dobësohemi për t’u dukur bukur në verë, në plazh dhe përpara të tjerëve, sepse dimri ka të mirë ca gjëra, ndërsa veshjet e lehta të verës ekspozojnë shumë. Kështu ne fillojmë parapërgatitjet që më parë për harlisjen e verës, për romancat që imagjinojmë dhe presim të kalojmë…pse jo edhe të kërkojmë edhe dashuritë e mëdha.
Kudo që të jeni vendosni kontakte reale me njerëzit. Vera është për t’u shijuar në natyrë reale dhe jo përmes mjeteve elektronike. Dilni në bare, restorante, plazhe male apo fusha, në ato pozicione ku do të përballeni me njerëzit dhe jo duke u fshehur, larg ku nuk ju arrin njeri. Edhe nëse jeni në një marrëdhënie dashurore apo të martuar flirtimi pranohet. Çdokush ka dëshirë të pëlqehet dhe të tërheqë vëmendjen ë të tjerëve por secili në mënyrën e vet, origjinale pa e ekzagjeruar dhe pa u bërë i bezdisur për të tjerët apo lënduar partnerin/partneren. Sa herë na ka ndodhur të jemi bërë xhelozë kur kemi kapur në “befasi” partnerin duke parë me cepin e syrit dikë që është ulur në një pozicion provokues apo ndoshta edhe dikë që është totalisht i/e çlirët ashtu si ia ka ënda. Të flirtosh dhe të jesh seksi ka mënyra pafund dhe secili nga ne mund ta bëj me lehtësinë më të madhe, mjafton të jetë vetvetja dhe të bej ato që dëshiron. Flirtimet të rrisin vetëvlerësimin dhe të bëjnë të ndihesh më mirë me veten, pa e keqpërdorur konceptin e kësaj fjale.
Filloni biseda me njerëz të panjohur në mënyrën më të natyrshme të mundshme, me pyetjet më të thjeshta, por mos harroni të shikoni nëse njerëzit janë të shoqëruar apo jo se ndryshe përfundoni në zënie në mes të plazhit, sepse flirti akoma konsiderohet për disa si ngacmim seksual…
Bëni shaka kur keni mundësi sepse çdokush do të dëshirojë të qeshë dhe të jetë i lirshëm. Boll jua ka nxirë jetën shefi/shefja gjatë vitit. Kur njerëzit kanë sens humori pranohen si më të parrezikshëm dhe pëlqehen prej të tjerëve. Vera është për kënaqësi, është për aventurë, është për të lëshuar adrenalinë! Në të njëjtën kohë mos harroni të bëni edhe dëgjuesin e mirë për dikë që jua ka ënda, por jo për ndonjë që fillon të ankohet për gjithçka sheh rrotull. Larg nga këta njerëz sepse ju prishin energjinë përreth vetes dhe ju futin në vorbullën e tyre të ankesave duke ju bërë të harroni të flirtoni.
Kujdes me gjuhën e trupit
Trupi ju flet më shumë se gjithçka tjetër! Pasioni duket që nga mënyra se si lëviz dhe të tregoni se jeni gati për veprim pa pasur frikë të përballeni më “rrezikun” duke qenë të hapur ndaj mundësive të reja. Frika na bën që trupi të mblidhet, t’i mbajmë shpatullat e ulura, të mbajmë kokën pak të ulur kur buzëqeshim… atëherë flirtimi nuk ka më vlerë! Kur t’i flisni një të panjohuri/e mbajeni kokën lart, shpatullat drejt dhe zemrën e hapur. Fiziku juaj tregon se naturalisht jeni gati për flirtime seksuale dhe për të kaluar bukur. Kujtoni që Dashuria është ligji kryesor i universit, të cilën çdokush nga ne e dëshiron, e kërkon, e ëndërron. Shumë prej sjelljeve tona janë thjesht pasqyrim i asaj që kemi dhe ndjejmë brenda vetes, prandaj pasioni për të bukurën dhe për të këndshmen vështirë se fshihet.
Sfidoni frikën nga refuzimi
Sfidat të japin më shumë adrenalinë gjatë veprimit! Nëse vera përfundon dhe nuk e arritët atë që ju pëlqeu, përsëri keni çfarë të kujtoni. Flirtimi nuk njeh moshë, seks apo duhet bërë në vende të caktuara. Thjesht lërini prangat e gjykimit këtë verë të kyçura diku dhe shijoni veten, natyrën, diellin njerëzit. Të flirtosh nuk është “mëkat” gjithmonë në aspektin sensual pa lënduar dikë.
Përse flirtojmë?
- Të arrijmë të gjejmë partnerin ideal për marrëdhënie seksuale
- Të lëvizim më tej nëse jemi në fillesat e marrëdhënies
- Të eksplorojmë potencialin e një marrëdhënie romantike
- Të inkurajojmë dikë të bëj atë që në dëshirojmë
- Të rrisim vetëvlerësimin
- Për kënaqësi
Listën mund ta zgjasni sipas dëshirës sepse çdokush ka dëshirat dhe sekretet e veta, ndër të cilat loja e hakmarrjes duhet lënë jashtë, edhe pse ndonjëherë funksionon.
Lëreni këtë verë pasionin e lirë duke ndjekur instinktin, i cili asnjëherë nuk ju çon në drejtimin apo njeriun e gabuar.
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
