FB

November 27, 2021 | 8:04

Gjendja e adoleshentëve në botë: më shumë se 1 në 7 vuajnë nga çrregullime të shëndetit mendor

Më shumë se një në 7 adoleshentë midis 10 dhe 19 vjeç jeton me një çrregullim mendor të diagnostikuar, ndërsa ankthi dhe depresioni përbëjnë 40% të të gjitha diagnozave në këtë grupmoshë. Po flasim për 89 milionë djem dhe 77 milionë vajza. Të dhënat, të cilat paraqiten në tablonë e shëndetit mendor të adoleshentëve në botë, vijnë nga raporti i fundit “Gjendja e fëmijërisë në botë. Në mendjen time: promovimi, mbrojtja dhe mbështetja e shëndetit mendor të fëmijëve dhe të rinjve” hartuar nga Unicef, agjencia e Kombeve të Bashkuara që punon për të promovuar të drejtat dhe përmirësimin e kushteve të jetesës së djemve dhe vajzave në mbarë botën.

Shëndeti mendor dhe pasojat e ardhshme

Sipas raportit, shumë përpara pandemisë Covid-19 “fëmijët dhe të rinjtë mbanin peshën e problemeve që lidhen me çrregullimet mendore, pa pasur investime të rëndësishme për adresimin e tyre”, shpjegon drejtoresha e përgjithshme e Unicef Henrietta Fore: “Qeveritë po investojnë shumë pak për të adresuar këto nevoja themelore. Nuk i kushtohet rëndësi e mjaftueshme marrëdhënies midis shëndetit mendor dhe pasojave të ardhshme në jetë”. Sipas Unicef-it, “vazhdojnë boshllëqet e gjera midis nevojave të shëndetit mendor dhe financimit të dedikuar”.

Faji (edhe) i Covid-19

Dhe sot situata është edhe më komplekse për shkak të kufizimeve të shumta në jetën shoqërore që janë vendosur si masa parandaluese kundër Covid-it në një vit e gjysmë të fundit, para së gjithash mbyllja e shkollave dhe mësimi në distancë, por edhe kufizimet në argëtim dhe aktivitetet sportive: “Kanë kaluar 18 muaj të gjatë për të gjithë ne, veçanërisht për fëmijët. Me bllokimet mbarëkombëtare dhe kufizimet e lëvizjes të lidhura me pandeminë, fëmijët kanë kaluar vite të pashlyeshme të jetës së tyre larg familjes, miqve, klasave, lojës, elementëve kyç të vetë fëmijërisë”, thotë Fore. Ndikimi është i rëndësishëm dhe është vetëm maja e ajsbergut: sipas raportit “fëmijët dhe të rinjtë mund të ndjejnë ndikimin e Covid-19 në shëndetin dhe mirëqenien e tyre mendore për shumë vite në vijim”.

Çdo vit pothuajse 46,000 adoleshentë (më shumë se një në çdo 11 minuta) vdesin nga vetëvrasja, që është një nga pesë shkaqet kryesore të vdekjes për grupmoshën e tyre. Sipas Unicef-it, “investime urgjente nevojiten në shëndetin mendor të fëmijëve dhe adoleshentëve në të gjithë sektorët, jo vetëm në sektorin e shëndetësisë, për të mbështetur një qasje ndaj parandalimit, promovimit dhe trajtimit që përfshin të gjithë shoqërinë”.

 

 

Burimi / https://humanum.al/

© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.

MARKETINGU:
[email protected] / Cel: 0688019400

© Revista Psikologjia. Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.

To Top