Nga Focus / Përktheu e përshtati Adela Kolea
Më 9 nëntor 1989 u shemb Muri i Berlinit. “East Side Gallery” është seksioni i mbetur nga struktura Muri i Berlinit, shndërruar tashmë në një galeri artistike me 100 murales të realizuar nga artistë të ardhur nga 20 vende të botës. Murali më i famshëm këtu është ai i “Puthjes vëllazërore”, ndërmjet leader-i rus Brezhniev dhe ish-presidentit të partisë komuniste të Gjermanisë Lindore, Erich Honecker.
Mural i artistit rus, Dimitri Vrubel, paraqet puthjen mes leader-it të Bashkimit Sovjetik, Brezhnjev dhe presidentit të Gjermanisë Lindore, Honecker, më 1979-ën. Artisti, për muralin pra, është bazuar në fotografinë e leader-ve në ’79-ën.
Duke anashkaluar faktin se tashmë prej gati dy vjetësh në epokën e pandemisë, janë shmangur shtrëngime duarsh, e jo më përqafime e aq më tepër puthje mes të njohurish, ngjall kureshti të përshkosh historinë e puthjes si formë përshëndetjeje, e cila jo vetëm është antike, por edhe globale, e përhapur në të gjithë botën e me domethënie apo simbolikë relative.
Romanë e Hebrenj
Në Romën e Lashtë, romanët aplikonin puthjen – e jo veç puthjen – si formë përshëndetjeje.
Hebrenjtë përdornin puthjen në shenjë vëllazërore, aq sa e aplikonin në buzë edhe ndër personash të së njëjtës gjini.
Puthja më e famshme?
Ajo mes Krishtit e Judës.
Edhe në letrat e apostolit Paolo përmendet shpesh puthja nën konceptimin e përshëndetjes vëllazërore mes personash që sapo takoheshin.
Kulturë: Sipas vendit ku gjendesh, përshtatet edhe puthja me domethënien përkatëse.
-Puthja midis Dantes dhe Virgjilit.
Në “Komedinë Hyjnore”, kapitulli VIII i Ferrit, Dante puthet në faqe nga Virgjili në formë respekti.
Ndërkohë, përgjatë gjithë Mesjetës, “vulosej” paqja apo armëpushimi nëpërmjet një puthjeje në buzë midis udhëheqësve të grupimeve kundërshtare.
Numri i puthjeve në formë përshëndetjeje nëpër botë.
Mbi numrin e puthjeve nëpër faqe, në formë përshëndetjeje, çdo vend në botë ka zakonet e përdorimet e veta përkatëse. “Udhëheq botën” nën këtë aspekt Franca, shtet në të cilin, nga krahina në krahinë ndryshon numri i puthjeve me funksion përshëndetës. Katër puthje p.sh të aplikuara në Francën veriperëndimore, pesë puthje në rrethinat e Korsikës, etj.
Tri puthje mjaftojnë në Holandë, Belgjikë, Zvicër, Poloni, ashtu sikurse edhe në shumë shtete me besim të krishterë ortodoks.
Puthja sidomos mes meshkujsh, qoftë pra për përshëndetje, shihet me mosbesim dhe distancë në Veriun e Evropës, shtete në të cilët, kontakti fizik mes të panjohurish, nuk është në asnjë mënyrë i mirë konsideruar.
Edhe në vendet myslimane, burrat puthen për t’u përshëndetur mes tyre. Është e ndaluar ndërkohë në këto vende, që mashkulli të puthë femrën në publik.
Së fundmi, deri para disa dhjetëvjeçarësh, në Rusi ishte e përhapur që të aplikohej puthja në buzë mes meshkujsh, siç na e kujtojnë disa episode apo fotografi, që paraqesin puthjen në buzë midis disa leader-ve komunistë përgjatë Luftës së Ftohtë.
Burimi:
“Le t’i japim dorën njëri-tjetrit.”
Nga Roberto Roveda.
Shtator, 2021.
Publikuar në revistën “Focus-Histori”.
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
