Ish zonja e parë Michelle Obama në një intervistë për ABC ka treguar se sa shumë e ka vuajtur humbjen e shtatzënisë së parë dhe problemet me të cilat është përballur për të mbetur përsëri shtatzënë. Ajo është një nga femrat më të adhuruara në botë dhe së fundmi ka vendosur të rrëfejë të gjithë historinë e saj përmes një libri autobiografik me titull “Becoming”.
E ftuar në emisionin “Good Morning America” në ABC, ish-Zonja e Parë zbuloi se kishte vendosur të fliste për herë të parë për abortin spontan që kishte përjetuar 20 vite më parë. Madje, Michelle rrëfeu se dy vajzat e saj ishin ngjizur falë fertilizimit ‘in vitro’.
“Ndihesha sikur kisha dështuar sepse nuk dija asgjë për abortin spontan sepse nuk flitej për të. Ulesha me dhimbjen dhe isha e shkatërruar. Kjo është arsyeja përse duhet të flasim me nënat e reja që përjetojnë të njëjtat fatkeqësi.” – u shpreh Michelle.
Michelle ka pritur për një kohë shumë të gjatë të ndajë këto detaje të rëndësishme të jetës së saj me miqtë apo me botën, e tanimë e cilëson si një gabim trashanik.
“Mendoj se është gjëja më e keqe që bëjmë ne gratë. Ulemi dhe nuk flasim kurrë realisht se çfarë ka ndodhur me trupin tonë.” – shtoi nëna e dy vajzave, Sasha dhe Malia.
Nga ana tjetër, Michelle zbuloi se ka pasur shumë probleme me bashkëshortin e saj dhe zgjidhja ishte terapia për çiftet. Probleme të cilat u rritën, pasi Barack Obama u fut në legjislaturën e shtetit, duke e lënë atë vetëm në shtëpi. Në këtë kohë Michelle ishte e detyruar ta përballonte vetë procesin e fertilizimit ‘in vitro’.
“Terapia e martesës për ne, ishte një nga ato mënyra, ku mësuam se si të flasim për dallimet tona. Unë njoh shumë çifte të reja që luftojnë dhe mendojnë se në një farë mënyre, ka diçka të gabuar me ta dhe dua që ata të dinë se, Michelle dhe Barack Obama, të cilët kanë një martesë fenomenale dhe që e duan njëri-tjetrin, punojnë me martesën e tyre.”- tha Michelle.
Burimi / http://www.today.it
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
