Këshilla & Arsye

November 11, 2017 | 7:38

“Posta”… protagonisti i këtij rrëfimi është alteregoja legjendare e Bukowski-t, Henri Çinaski

… Por herë-herë, një grua ecën drejt teje, në lule të moshës, me fustanin që duket sikur do t’i shpërthejë… një krijesë seksi, një mallkim, fundi i gjithçkaje.

I lindur dështak, me një profesion pa rrugëdalje, i cili nuk i jep asnjë kënaqësi personale e megjithatë, me mjaft vetëdije sa për të dalluar absurditetin e situatës së tij, Çinaski është emblema e njeriut të zakonshëm.

pegi-posta

“Posta”, romani i parë i Charles Bukowski-t, një ish-nëpunësi të rëndomtë poste, u botua më 1971 dhe tronditi fort Shtetet e Bashkuara të Amerikës. Siç do të ndodhte për pothuajse gjithë prozën e tij, protagonisti është alteregoja legjendare e Bukowski-t, Henri Çinaski. Rrëfimi nis kur Çinaski, alkoolik, i zymtë por i zgjuar, fillon punë si zëvendëspostier pasi merr vesh “se po punësonin thuajse kë t’u dilte përpara, kështu që shkova dhe, pa e kuptuar, e gjeta veten me një çantë lëkure krahaqafë, duke u endur poshtë e lart sipas qejfit.” Ditët e tij mbushen pak nga pak nga grindjet me shefin dhe nga përleshjet me qentë e me epshin e grave të vetmuara. Netëve, ai dehet dhe merret me të dashurën gjithashtu të alkoolizuar. Puna e postierit mund të ishte puna e ëndrrave, por kjo ëndërr mohohet vrazhdësisht nga realiteti: ai e gjen veten thellësisht të zhgënjyer nga rutina e përditshme dhe nga rregulloret e ngurta të makinës burokratike. Çinaski do ta lërë punën për të provuar fatin e tij tjetërkund, vetëm për të

zbuluar që për njerëz si ai, fati është shumë kokëfortë. Ai punon plot dymbëdhjetë vjet në Postë, i pështirosur nga ai institucion i madh që, në fund të fundit, është vetë jeta.

Kritika

Një rrëfim i mrekullueshëm, zbavitës dhe me humor të spikatur i jetës së një njeriu të ngërthyer në një labirint pa krye. – Sunday Times

Të zë prej supesh e të shkund mirë e mirë, sa të kërcëllijnë dhëmbët. – The Times

Fakti që Bukowski shkroi për punën, dhe jo punën e mrekullueshme, por atë të përditshmen e të mërzitshmen, e bën një ndër shkrimtarët më të pazakontë dhe të rëndësishëm të Amerikës. – Howard Sounes, biograf i Bukowski-t

“Vëzhgues” i hollë, i trishtë, finok dhe hokatar, një nga librat më zbavitës që kam lexuar. -Uncut

Posta rrëfen njeriun e zakonshëm që bën gjëra të zakonshme dhe është i hapur dhe i sinqertë në lidhje me realitetin e tij. Ai nuk sajoi asgjë, nuk kishte nevojë. Këtë e di, sepse nuk gënjeu fare as për ne të dy, aq sa u vura vërtet në siklet. – Linda Lee Bukowski

charlesbukowski

Autori

Charles Bukowski ishte shkrimtari legjendar kalifornian, që u bë i famshëm për veprat e tij gjysmë-autobiografike për jetën e shtresave të ulëta amerikane. Ai lindi në Gjermani më 1920, i ati, asokohe ishte ushtar amerikan me shërbim në Gjermani dhe e ëma gjermane. U kthye në Amerikë në moshën 3-vjeçare. Ai u rrit në Los Anxheles dhe kaloi atje pjesën më të madhe të jetës së tij. Gjatë gjithë jetës botoi më shumë se dyzet e pesë libra në prozë dhe poezi, që të gjithë të përkthyer në mbi një dyzinë gjuhësh. Romanet si “Factotum”, “Bukë me sallam” dhe “Post Office” e bënë këtë alkoolik të përhershëm, e dikur edhe endacak, një shkrimtar të famshëm e të pasur, krijimtaria e të cilit kulmoi në filmin biografik Barfly. Ai vdiq më 1994.

Fragmente nga libri

… nga dreqin ta di unë kush je ti ose kush jam unë ose kush është cilido?

… Doja o gjithë botën, o asgjë.

… Shiko, zemër, më vjen keq, por nuk e kupton që kjo puna po më çmend fare? Dëgjo,hajde ta  lëmë këtë punë. Eja rrimë vërdallë, bëjmë dashuri, dalim xhiro, bisedojmë pak. Eja shkojmë në kopshtin zoologjik. Eja të shohim kafshët. Të zbresim me makinë e të kundrojmë oqeanin. Vetëm 45 minuta larg është. Eja të shkojmë në lokalet e lojërave elektronike. Shkojmë të shohim garat, Muzeun e Arteve, ndeshjet e boksit. Eja të bëjmë miq. Të qeshim. Kjo lloj jete është lloji i jetës që bëjnë të gjithë: po na mbyt.

 

Titulli: Posta

Autori: Charles Bukowski

Përktheu: Iris Sojli

Zhanri: Roman

Data e botimit: Nëntor, 2017

Numri i faqeve: 194

 

To Top

Powered by themekiller.com anime4online.com animextoon.com apk4phone.com tengag.com moviekillers.com