Përshëndetje! Jam një vajzë 23 vjeçe dhe po ju shkruaj për t’ju treguar “problemin” tim: Jam fejuar prej një viti me një djalë që e dua shumë dhe është një ndjenjë reciproke. Unë jam një person shumë i ndjeshëm dhe i vëmendshëm ndaj detajeve, ndaj gjërave të vogla dhe kjo ndonjëherë më rezulton të jetë problem sepse vërej edhe ndryshimet më të vogla tek i dashuri.
Vë re nëse shkëmbimet e mesazheve mes nesh pakësohen, nëse ndonjëherë është më i nxituar se të tjerët për të më treguar për ditën e tij, shqetësohem nëse nuk flasim për nja dy ditë e kështu me radhë.
Kur kjo ndodh, mendoj gjithmonë për më të keqen, nuk ndihem e qetë dhe nuk mund të përqendrohem në studimin. Në kokën time më lindin një sërë mendimesh si “më ka lodhur, nuk është më i dashuruar” etj. E di që nuk kam asnjë arsye për t’u shqetësuar, sepse ai gjithmonë më ka treguar se më do dhe shpesh e gjej veten duke u shqetësuar dhe duke u bërë shumë paranojake.
Ndaj do të doja t’ju pyesja nëse keni ndonjë këshillë për të më dhënë ose ndonjë ushqim për të menduar për të shmangur “të menduarit shumë”, për të ndaluar këtë rrjedhë mendimesh, për të mos u shqetësuar së tepërmi dhe për ta jetuar marrëdhënien në një mënyrë të qetë pa krijuar një mijë mendime negative dhe ankth.
Përgjigje: Përshëndetje! Faleminderit për ndarjen e përvojës tuaj. Ndjeshmëria juaj, siç e përshkruani, është një tipar që ju lejon të perceptoni detajet dhe nuancat në ndërveprimet tuaja me të tjerët. Është e qartë se ju kujdeseni thellësisht për marrëdhënien tuaj dhe se vëmendja juaj ndaj detajeve ju lejon të vini re edhe ndryshime të vogla në sjelljen e të dashurit tuaj.
Nga historia juaj, del një lloj “hiper-vigjilencë” emocionale, e cila mund të ketë rrënjë në përvojat e kaluara ose frikë të thellë. Mund të ndodhë që në situatat e mëparshme të keni përjetuar momente zhgënjimi ose tradhtie dhe, tani, një mekanizëm i brendshëm mbrojtës përpiqet të parashikojë çdo problem në marrëdhënien tuaj aktuale. Intensiteti i ndjenjave tuaja dhe thellësia e mendimeve tuaja janë të qarta.
Nëse mendoni se këto modele mendimi po ndikojnë në paqen dhe mirëqenien tuaj, mund të jetë e dobishme të merrni parasysh terapinë individuale. Një psikolog mund t’ju ndihmojë të eksploroni emocionet tuaja dhe të kuptoni më mirë veten dhe dinamikën e marrëdhënies që përjetoni.
Dr. Nicoleta Senni, psikologe
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
