“Papa mund të luajë një rol shumë domethënës në këtë konflikt dhe në zgjidhjen e tij. Ka hapësira.” Kështu deklaroi Sekretari i Vatikanit për Marrëdhëniet me Shtetet, Imzot Paul Richard Gallagher, në një intervistë për Vatican News në përfundim të misionit të tij në Ukrainë. “Presidenti Zelensky tha se përballë një lufte që vazhdon, në fund duhet të jetë diplomacia ajo që i zgjidh gjërat; palët në konflikt duhet të vijnë në tryezë për të negociuar”, shtoi ai, duke përsëritur edhe një herë mundësinë e një roli të Selisë së Shenjtë.
Angazhimi i Papës për kërkimin e paqes – “Nuk është e lehtë” të rivendosësh paqen në Ukrainë, pranon Selia e Shenjtë pas misionit diplomatik në Kiev. Por kjo është e vetmja mënyrë praktike, në të cilën Papa mund të luajë një rol themelor. Në lutjen e tij të fundit Regina Caeli, Papa Françesku i kërkoi Zotit që të fuste “frymën e paqes tek udhëheqësit e kombeve”. Ndërkohë, nga Cascia, bashkëpunëtori i tij më i afërt, Sekretari i Shtetit, Kardinali i Vatikanit, Pietro Parolin, shprehu shpresën që “negociatat të nisin sa më shpejt dhe të arrihet paqja e shumëdëshiruar”. Selia e Shenjtë mbetet në dispozicion për të lehtësuar procesin. “Papa mund të vazhdojë të luajë ende një rol shumë domethënës në këtë konflikt dhe në zgjidhjen e tij, pasi ka hapësira”, tha ministri i jashtëm i Vatikanit, Paul Richard Gallagher, në përfundim të misionit të tij në Ukrainë.
Diplomacia në punë – Sipas Zelensky, i takon diplomacisë të zgjidhë gjërat “palët në konflikt duhet të vijnë në tryezë për të negociuar”, raporton ministri i Jashtëm i Vatikanit, i cili përsëriti disponueshmërinë e një roli për Selinë e Shenjtë. Vetë Gallagher, pasi ka parë dëmtimet në terren, ato materiale por edhe dhimbjet e një kombi që po përpiqet të gjejë një rrugëdalje thotë se “Ukraina duhet të mbrohet dhe për ta bërë këtë duhet të marrë ndihma, përfshirë atë ushtarake”. Por ai kërkon të shmanget “një garë armatimi”; përkundrazi “është e nevojshme që Ukraina të përfshihet në të gjitha nismat në favor të paqes
Fokusimi te të dëbuarit – Vatikani në këto orë mund të jetë ndër aktorët që kërkojnë, në përputhje me ligjin ndërkombëtar, një kthim në territorin ukrainas të njerëzve, civilëve dhe ushtarëve, të cilët, pas evakuimit të fabrikës së çelikut Azovstal në Mariupol, u deportuan në Rusi ose në territoret e kontrolluara nga Rusia. “Ne po llogarisim pjesëmarrjen aktive të Selisë së Shenjtë në çlirimin e qytetarëve ukrainas të dëbuar nga Rusia dhe të ndaluar në territorin rus”, kishte shpresuar të premten ministri i Jashtëm ukrainas Dmytro Kuleba, pas takimit të tij me Gallagher. Dhe mbase nuk është rastësi që pas takimit me Papa Françeskun më 11 maj, gratë e ushtarëve të batalionit Azov kanë qenë orët e fundit në Stamboll për të kërkuar një angazhim edhe nga patriarku ortodoks Bartolomeu.
Dosja e Kinës – Përveç Ukrainës, në tryezën e Sekretariatit të Shtetit të Vatikanit është edhe një dosje tjetër e rëndësishme, ajo e Kinës, sidomos pas arrestimit të Card. Joseph Zen, i cili më vonë u lirua me kusht. “Unë ndjek me vëmendje dhe pjesëmarrje jetën dhe ngjarjet shpesh komplekse të besimtarëve dhe pastorëve, tha Papa në lutjen Regina Caeli, duke shpresuar se “Kisha në Kinë mund të ushtrojë misionin e saj për të shpallur Ungjillin për të gjithë, duke ofruar kështu edhe një kontribut pozitiv në përparimin shpirtëror dhe material të shoqërisë”.
Burimi / https://www.tgcom24.mediaset.it/
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
