Rezultatet e mira në matematikë mund të varen nga nëna ose babai. Ky është përfundimi i një studimi nga Universiteti i Pittsburgh-ut, rezultatet e të cilit janë botuar në revistën “Developmental Science”.
Protagonistë të studimit ishin 54 fëmijë të etnive të ndryshme nga 5-8 vjeç dhe 51 prindër, nga mosha 30-59 vjeç. Aftësitë e tyre në matematikë u vunë në provë me testin standard Woodcock-Johnson III. Fëmijët plotësuan edhe tri teste të tjera mbi aftësitë e tyre në veprimet matematikore si dhe për të mbajtur mend numrat bazë, ndërkohë që prindërit plotësuan një test mbi lehtësinë në zgjidhjen e problemave.
“Besojmë se lidhja mes zotësisë matematikore të prindërve dhe fëmijëve varet nga një kombinim i trashëgimisë me faktorët ambientalë” ka deklaruar grupi i studiuesve.
“Në studimet e ardhshme do të analizojmë me detaje nivelin e transmetimit të pjesëve genetike dhe përbërjen e një ambienti familjar, të favorshëm për përparimin e studentëve të matematikës, të cilët janë me rezultate të shkëlqyera.”
Botuar në Revistën “Psikologjia”, Nr. 123
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.