Ata që pinë kafe shpesh pyesin veten nëse kafeina mund të përmirësojë kujtesën e tyre. Kjo për shkak se shumë nga ata që e konsumojnë pijen në mënyrë të rregullt vërejnë se duken më vigjilentë kur kanë pirë një të tillë. Një pirës i kafesë, i cili e përshkroi veten si ” një person harraq” u betua se kujtesa e tij u përmirësua pas një filxhani kafeje.
Por a ka në të vërtetë një lidhje mes të dyjave, apo lidhja është vetëm në mendjet e atyre që pinë kafe?
Si funksionon kafeina?
Kafeina është një ilaç stimulues që ndikon drejtpërdrejt në tru dhe është treguar pa dyshim se rrit vigjilencën. Disa studime kanë treguar se kafeina mund të përmirësojë disa lloje të kujtesës, veçanërisht aspektet globale të kujtesës. Hulumtimet më të thelluara tregojnë se përfitimi i kafeinës në kujtesë varet nga gjendja. Kjo do të thotë që kafeina përmirëson kujtesën vetëm nëse përdoret si në kohën e marrjes së informacionit, ashtu edhe në kohën e rikujtimit të informacionit më vonë. Nëse nuk përdoret kafeinë në momentin e paraqitjes së informacionit, njerëzit performojnë më keq nëse e marrin atë në kohën kur duhet të mbajnë mend informacionin. Studime të tjera tregojnë se me disa detyra të kujtesës, kafeina në fakt përkeqëson performancën. Njerëzit gjithashtu kujtojnë më shumë kujtime të rreme kur janë nën ndikimin e kafeinës, kështu që mund të ketë efektin e stimulimit të trurit tuaj që të krijojë kujtime në mënyrë të pasaktë.
Efektet e kafeinës në kujtesën e të moshuarëve
Ka pasur disa kërkime inkurajuese në lidhje me përdorimin e kafeinës tek të moshuarit për të luftuar rëniet natyrore të kujtesës që lidhen me moshën. Për shembull, një studim tregoi se kafeina zvogëloi rënien e kujtesës pasdite të përjetuar nga “njerëzit e mëngjesit” – të rriturit e moshuar që në përgjithësi performojnë më mirë në mëngjes sesa në pasdite. Megjithatë, studime të tjera tregojnë se kafeina nuk është një mënyrë e besueshme për të përmirësuar kujtesën tek njerëzit e moshuar. Në fakt, hulumtimi ka treguar se njerëzit e moshuar kanë performancë më të dobët në testet e kujtesës episodike pasi kanë konsumuar ushqime që përmbajnë kafeinë, sesa ata që nuk e bëjnë këtë. Dhe megjithëse ka prova që përdorimi i zakonshëm i kafeinës shoqërohet me një avantazh modest në kujtesën afatgjatë, kjo nuk kundërshton rëniet e kujtesës të lidhura me moshën.
Përgatiti K.I / Burimi verywellmind.com
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
