Njerëzit që përjetojnë nivele të larta ankthi social mund të jenë më të prirur të përshtatin emocionet e tyre me reagimet negative të njerëzve përreth.
Një studim i publikuar në revistën shkencore Biological Psychology sugjeron se ky “konformizëm emocional” mund të luajë një rol në ruajtjen e simptomave të ankthit social. Ankthi social karakterizohet nga frika e fortë se si individi gjykohet nga të tjerët dhe nga dëshira për t’u pranuar prej tyre. Në këto kushte, përshtatja me grupin mund të shfaqet si një mënyrë për të shmangur refuzimin ose konfliktin. Studiuesit Lixia Cui, Xiaofei Dong dhe kolegët e tyre nga Universiteti Capital Normal dhe Universiteti Zhejiang Normal u përqendruan te mënyra se si njerëzit me ankth social reagojnë jo vetëm në mendime apo opinione, por edhe në nivelin e emocioneve të tyre të brendshme.
Sipas gjetjeve, individët me ankth më të lartë social kanë tendencë më të madhe të përshtatin gjendjen e tyre emocionale me reagimet negative të grupit. Ky proces mund të ndikojë në mënyrën se si ata e interpretojnë informacionin social dhe t’i bëjë më të prirur të përqendrohen te sinjalet e kritikës, refuzimit apo mospajtimit. Studiuesit analizuan gjithashtu aktivitetin e trurit gjatë përpunimit të konfliktit social. Një prej treguesve të vëzhguar ishte një reagim elektrik që shfaqet rreth 400 milisekonda pas momentit kur individi përjeton mospërputhje me qëndrimin e grupit.
Gjetjet sugjerojnë se për njerëzit me ankth social, reagimet negative të të tjerëve mund të kenë një ndikim më të theksuar në përpunimin emocional. Në vend që të mbështeten te përjetimi i tyre fillestar, ata mund të orientohen më shumë drejt emocioneve që perceptojnë te të tjerët. Studimi ngre kështu një pyetje të rëndësishme psikologjike: sa shpesh ndryshojmë atë që ndiejmë jo sepse ndryshuam mendje, por sepse kemi frikë se si do të na gjykojnë të tjerët?
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
