Pediatrja e njohur Lira Gjika ngre shqetësimin për mënyrën se si komunikojnë të rriturit me fëmijët, duke kërkuar që shprehja “mbylle gojën” të ndalohet me ligj në institucionet shkollore dhe parashkollore.
Përmes një reagimi, Gjika argumenton se përdorimi i kësaj shprehjeje nuk është thjesht një mënyrë e ashpër komunikimi, por mund të shkaktojë te fëmija ndjenja kërcënimi dhe turpi.
“Kur i thuhet një fëmije ‘mbylle gojën’, ai jo vetëm ndihet keq, por ndihet i kërcënuar dhe i turpëruar njëkohësisht”, shprehet pediatrja. Sipas saj, kjo mënyrë komunikimi është bërë pjesë e përditshmërisë dhe përdoret në familje, shkolla, ambiente publike dhe në marrëdhëniet mes të rriturve dhe fëmijëve, shpesh pa u konsideruar si problematike.
Gjika e lidh këtë çështje edhe me përdorimin e fjalës “pusho”, e cila, sipas saj, nuk duhet të përdoret në institucionet shkollore dhe parashkollore. Ajo thekson se, pavarësisht ndalimeve, shprehje të tilla vijojnë të jenë pjesë e fjalorit të përditshëm.
Pediatrja apelon për një ndryshim në mënyrën e komunikimit me fëmijët, duke e konsideruar të domosdoshme përmirësimin e fjalorit që përdoret në familje dhe në institucionet arsimore.
“Ka ardhur koha, madje jemi vonë, për të përmirësuar fjalorin, sepse janë fjalët ato që krijojnë e zhvillojnë mendimin. Njeriu mendon në bazë të fjalëve që përdor”, argumenton Gjika.
Sipas saj, përdorimi i një fjalori të kufizuar dhe autoritar e vështirëson zhvillimin e të menduarit dhe ndërgjegjësimin për pasojat që mund të kenë fjalët dhe mënyra e komunikimit.
Në fund, Gjika u drejtohet prindërve, mësuesve, edukatorëve dhe të gjithë të rriturve, duke i ftuar të shmangin shprehje të tilla në komunikimin me fëmijët.
“Përpiquni prindër, mësues, edukatorë dhe të rritur në përgjithësi, t’i shmangni këto shprehje”, apelon pediatrja.
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
